Kooxda Xuuthiyiinta ee Yemen ayaa si rasmi ah ugu dhawaaqday inay ku biirtay dagaalka sii ballaaranaya ee ku lug leh Iran, iyadoo digniin culus u dirtay Mareykanka iyo xulafadiisa.
War ka soo baxay hoggaanka kooxda ayaa lagu sheegay in ay beegsan doonaan maraakiibta Mareykanka ee ku sugan Badda Cas haddii Washington ay si toos ah uga qayb qaadato weerarrada ka dhanka ah Iran.
“Dagaalkan waa dagaalka guud ee ummadda Islaamka,” ayuu yiri mas’uul ka tirsan Xuuthiyiinta, isagoo ku eedeeyay Mareykanka iyo Israa’iil inay doonayaan inay Iran meesha ka saaraan si ay gobolka u hoos geeyaan saameynta Israa’iil.
Xuuthiyiinta, oo ah koox hubeysan oo Iran taageerto, ayaa horey weerarro ugu qaaday maraakiibta ganacsiga iyo kuwa milatari ee mara Badda Cas, taasoo saameyn ku yeelatay mid ka mid ah marinnada ganacsi ee ugu muhiimsan caalamka.
Khudbaddan cusub ayaa muujineysa suurtagalnimada in colaadda Bariga Dhexe ay sii fido, iyadoo khubaradu ka digayaan in furin cusub oo dagaal ay ka furanto Yemen, taasoo kordhin karta halista amni iyo mid dhaqaale ee gobolka iyo caalamkaba.
