Muqdisho (Banaadir24) — Wasiirka Amniga Dowlad Goboleedka Koonfur Galbeed oo si dhow ula safan Madaxweyne Cabdicasiis Xasan Maxamed (Laftagareen) ayaa jeediyay hadallo kulul oo xambaarsan eedeymo siyaasadeed iyo digniino culus, isagoo weerar afka ah ku qaaday Madaxweynaha Soomaaliya Xasan Sheekh Maxamuud iyo mas’uuliyiin ka tirsan dowladda federaalka.
Wasiirka ayaa sheegay in markii hore ay shacabka Soomaaliyeed uga digeen waxa uu ku tilmaamay qorshe uu Xasan Sheekh ku doonayay inuu Koonfur Galbeed ku hoos geeyo awoodda Villa Soomaaliya, isagoo xusay in dad badan aysan xilligaas rumeysan digniinahooda, balse uu sheegay in xaaladda maanta taagan ay muujineyso xaqiiqada arrintaas.
Wuxuu sidoo kale soo hadal qaaday khilaafka siyaasadeed ee ka dhex taagan hay’adaha dowladda federaalka, gaar ahaan loollanka la xiriira Guddoomiyaha Maxkamadda Sare, isagoo ku dooday in dalka uusan lahayn dowlad qaran oo si dhab ah u shaqeyneysa, isla markaana hay’adaha dowladda loo adeegsanayo dano siyaasadeed oo ku saleysan qabiil.
Dhanka kale, wasiirka ayaa digniin toos ah u diray Liibaan Shuluq oo uu ku eedeeyay inuu dhaqaale kasoo gala ganacsiga qaadka u adeegsanayo falal uu sheegay in lagu wiiqayo xasilloonida iyo jiritaanka maamulka Koonfur Galbeed.
“Liibaan waan ku naqaannaa, waxaan ognahay dhaqaalaha aad qaadka ka hesho iyo sida aad ugu maalgelinayso qorshayaal lagu burburinayo Koonfur Galbeed. Ficilladaas cawaaqibkooda waad wajihi doontaa,” ayuu yiri wasiirku.
Wasiirka ayaa intaas ku daray in Koonfur Galbeed maanta aysan ahayn maamulkii hore ee la weerari jiray, isagoo si adag u sheegay in xaaladda maanta ay ka duwan tahay sidii ay ahaan jirtay waayihii hore.
Taageero loo muujiyay Ugaas Yuusuf
Wasiirka Amniga Koonfur Galbeed ayaa sidoo kale taageero buuxda u muujiyay Ugaas Yuusuf Ugaas Xasan, oo ah hoggaamiyaha dhaqanka ugu sarreeya ee beesha Xawaadle, kaddib dhaqdhaqaaqyada ciidan iyo baaqyada uu ka jeediyay gobolka Hiiraan.
Wuxuu sheegay in Koonfur Galbeed ay garab taagan tahay Ugaaska, isagoo xusay in ciidanka Daraawiishta maamulka ay diyaar u yihiin inay fududeeyaan safarka iyo dhaqdhaqaaqa ciidamada dowladda federaalka ee doonaya inay gaaraan magaalada Beledweyne.
Hadalladan ayaa kusoo aadaya xilli uu sii xoogeysanayo khilaafka siyaasadeed iyo kan amni ee u dhexeeya Dowladda Federaalka iyo maamullada qaar, iyadoo xiisadda Hiiraan ay hadda isku xirayso hoggaamiyeyaasha dhaqanka, ciidamada dowladda, maamullada gobollada iyo loollanka siyaasadeed ee dalka.
