Muqdisho (Banaadir24) — Dowladda Federaalka Soomaaliya ayaa digniin culus ka soo saartay iskaashi militari iyo mid farsamo oo la sheegay inuu sii xoogeysanayo oo u dhexeeya kooxda Xuutiyiinta Yemen iyo ururka Al-Shabaab, kaas oo laga cabsi qabo inuu kordhiyo awoodda dagaal ee kooxda Al-Shabaab.
Wasiiru-dowlaha Wasaaradda Arrimaha Dibadda Soomaaliya, Cali Maxamed Cumar (Cali Balcad), oo wareysi siiyey telefishinka TRT World, ayaa sheegay in xiriirka labada dhinac uu u muuqdo mid ka gudbay isku socodkii hubka sharci darrada ah, islamarkaana uu hadda gaarayo dhinacyada farsamada milatari iyo iskaashiga hubka.
Cali Balcad ayaa tilmaamay in inkastoo Xuutiyiinta iyo Al-Shabaab ay kala duwan yihiin fikir ahaan iyo ujeeddooyinkooda siyaasadeed, haddana ay jiraan calaamado muujinaya wada-shaqeyn dhinacyada farsamada iyo awoodaha milatari.
Wuxuu ka digay in haddii Al-Shabaab ay hesho aqoon dheeraad ah oo ku saabsan diyaaradaha aan duuliyaha lahayn (Drones), samaynta hubka iyo farsamooyinka dagaalka, ay taasi sare u qaadi karto awoodda ay ku fulin karto weerarro ka khatar badan kuwii hore.
Wasiiru-dowluhu wuxuu sidoo kale sheegay in Yemen ay muddo dheer ahayd marin ay hubka sharci darrada ah uga soo gudbaan Soomaaliya, balse uu xusay in walaaca hadda jira uu yahay in xiriirkaasi u muuqdo mid ka gudbaya tahriibinta hubka oo gaaraya tababbarro iyo iskaashi farsamo.
Warbixin ay horay u soo saartay hay’adda cilmi-baarista amniga ee Seldg ayaa sidoo kale tilmaantay in xiriirka Xuutiyiinta iyo Al-Shabaab uu yeeshay dhinacyo milatari, saadka, sirdoonka iyo warbaahinta, iyadoo ay jiraan eedeymo la xiriira tababbarro ku saabsan diyaaradaha aan duuliyaha lahayn iyo samaynta walxaha qarxa.
Dhanka kale, walaaca Soomaaliya ma ahan mid ku kooban amniga gudaha dalka, balse wuxuu sidoo kale la xiriiraa amniga Badda Cas iyo Gacanka Cadmeed oo ah marinno muhiim u ah ganacsiga caalamka.
Cali Balcad ayaa ugu baaqay dalalka ku teedsan labadaas marin-biyood inay si wadajir ah uga shaqeeyaan sugidda amniga gobolka, halkii mas’uuliyadda oo dhan lagu tiirsanaan lahaa quwadaha shisheeye.
Iskaashiga la tuhunsan yahay ee labada kooxood ayaa sare u qaaday walaaca laga qabo in hubka, tababbarada iyo farsamooyinka milatari ee Yemen ay saameyn ku yeeshaan amniga Soomaaliya iyo guud ahaan Geeska Afrika.
