Ciidamada xaq u dirirka Macawiisleyda ee Gobolka Hiiraan ayaa xalay howlgal qorsheysan ka fuliyay deegaano hoostaga Degmada Maxaas ee Gobolka Hiiraan, halkaas oo lagu dilay laba ka mid ah maleeshiyaadka Al-Shabaab.
Sida ay warbaahinta u sheegeen saraakiisha hoggaaminaysay howlgalka, weerarkan ayaa ahaa mid si taxadar leh loo qorsheeyay, islamarkaana si guul leh kusoo dhammaaday. Saraakiishu waxay tilmaameen in bartilmaameedka howlgalka si sax ah loo gaaray, isla markaana aan wax khasaare ah kasoo gaarin dhinaca ciidamada fuliyay.
Howlgalkaan ayaa qeyb ka ah dadaallada joogtada ah ee ay wadaan ciidamada Macawiisleyda iyo shacabka deegaanka ee ka dhanka ah Al-Shabaab, kuwaas oo muddooyinkii u dambeeyay kordhiyay weerarada ka dhanka ah kooxda.
Saraakiisha ayaa sidoo kale caddeeyay in ay sii wadi doonaan howlgallada noocaan oo kale ah ilaa iyo inta ay Al-Shabaab ka saarayaan guud ahaan Gobolka Hiiraan, iyagoo ku baaqay in shacabka ay la shaqeeyaan ciidamada si loo xaqiijiyo amniga iyo xasilloonida deegaanka.
Ugu dambeyn, waxaa la filayaa in howlgalada ka socda gobolka ay sii xoogeystaan, maadaama ciidamada deegaanka ay muujinayaan dadaal joogto ah oo lagu ciribtirayo kooxda Al-Shabaab.
