Beledweyne (Banaadir24) – Xaaladda amni ee magaalada Beledweyne ee xarunta gobolka Hiiraan ayaan caadi ahayn, kaddib markii la soo sheegay in magaalada la geeyey ciidamo aad u hubeysan iyo saanad milatari oo culus.
Wararka ka imaanaya magaalada ayaa sheegaya in ciidamo hubeysan la geeyey qeybo kala duwan oo Beledweyne ah, iyadoo hubka culus qaarkiis la dulsaaray saqafyada dhismayaasha qaarkood. Sidoo kale, hubka lidka diyaaradaha ayaa la sheegay in la geeyey garoonka diyaaradaha magaalada.
Dhaqdhaqaaqyadan ciidan ayaa la sheegay inay la xiriiraan qorshe looga hortagayo imaanshaha Cabi Fataax Xasan Afrax, oo ah mas’uul sare oo ka tirsan maamulka HirShabelle, kaas oo dhawaan lagu doortay magaalada Jowhar.
Xiisaddan ayaa daba socota amar uu horey u soo saaray guddoomiyihii xilka laga qaaday ee gobolka Hiiraan, Maxamed Xuseen Maxamed Carab, kaas oo lagu mamnuucay in diyaaradaha ay Beledweyne geeyaan mas’uuliyiinta ka tirsan maamulka HirShabelle ee taageerada ka hela dowladda federaalka.
Khilaafka siyaasadeed ee u dhexeeya dhinacyada isku haya maamulka HirShabelle ayaa haatan u muuqda mid saameyn ku yeeshay xaaladda amni ee Beledweyne, iyadoo dhaq-dhaqaaqyada ciidan ee la soo sheegay ay sii kordhiyeen walaaca laga qabo iska horimaad hubeysan.
Dadka ku nool magaalada ayaa wajahaya hubanti la’aan, iyadoo aan weli la ogeyn halka ay ku dambeyn doonto xiisaddan iyo in qorshaha imaanshaha mas’uulkaasi uu rumoobi doono.
