Ankara (Banaadir24) — Dowladda Turkiga ayaa ku dhawaaqday inay Soomaaliya u soo direyso laba markab dagaal oo sida saanad iyo qalab milateri, xilli ay sii xoogeysanayaan xiriirka iskaashiga dhinacyada difaaca iyo amniga ee labada dal.
Wasaaradda Gaashaandhigga Turkiga ayaa sheegtay in maraakiibta dagaalka ee kala ah TCG Gökçeada iyo TCG Yıldırım ay Jimcaha, 30-ka Oktoobar, u soo ambabixi doonaan Soomaaliya.
Labadan markab ayaa sida lagu sheegay warbixinta qaadi doona agab iyo qalab milateri, hase yeeshee dowladda Turkiga ma shaacin nooca qalabka ay sidaan, tirada uu ka kooban yahay iyo cidda sida rasmiga ah loogu talagalay.
Sidoo kale, lama caddeyn in saanadda milateri loogu talagalay Ciidamada Xoogga Dalka Soomaaliyeed iyo in ay tahay sahay loogu talagalay ciidamada Turkiga ee ku sugan Soomaaliya.
Tallaabadan ayaa imaaneysa iyadoo Ankara iyo Muqdisho ay sii xoojinayaan iskaashigooda dhinacyada difaaca, tababarka ciidamada iyo amniga badda.
Turkiga ayaa Soomaaliya ka taageera tababarka iyo qalabeynta ciidamada, isagoo sidoo kale Muqdisho ku leh xarun weyn oo lagu tababaro ciidamada Soomaaliyeed.
Labada dal ayaa sidoo kale leh heshiisyo iskaashi oo la xiriira difaaca iyo amniga xeebaha Soomaaliya.
