Muqdisho (Banaadir24) — Diyaarad laga leeyahay dalka Kenya oo galabta ka duushay garoonka diyaaradaha Aadan Cadde ee magaalada Muqdisho ayaa la sheegay inay dalka Uganda u qaadday 111 askari oo ka tirsan ciidamada Uganda, taasoo noqonaysa duulimaadkii ugu horreeyay ee daad-gureyn ah oo la xiriira ciidamada Uganda ee ku sugan Soomaaliya.
Diyaaraddan oo nooceedu yahay Fokker 100, laguna diiwaangeliyey lambarka 5Y-SKE, ayaa la sheegay in dowladda Uganda ay kireysatay si ay ciidamadeeda uga qaaddo Soomaaliya.
Tallaabadan ayaa timid kaddib markii la sheegay in Madaxweynaha Uganda, Yoweri Museveni, uu dhiggiisa Soomaaliya, Xasan Sheekh Maxamuud, ku wargeliyey qorshaha dowladdiisa ee ah inay qayb ka mid ah ciidamadeeda kala baxdo Soomaaliya ka hor 15-ka November 2026.
26-kii October, Madaxweyne Xasan Sheekh ayaa booqasho hal maalin ah ku tegay magaalada Kampala, halkaas oo uu kula kulmay Museveni, isagoo la sheegay inuu isku dayayey inuu ku qanciyo dowladda Uganda inay dib uga laabato go’aanka ciidamadeeda.
Hase yeeshee, ilo xog-ogaal ah ayaa sheegaya in wada-hadallada labada dhinac aysan ku dhammaan heshiis lagu beddelayo go’aanka Kampala.
Ciidamada Uganda ee ku howlgala heshiisyada amni ee labada dal iyo howlgalka Midowga Afrika ee AUSSOM ayaa la sheegay inay qayb ka yihiin ciidamada laga saarayo Soomaaliya.
Gobolka Shabeellaha Hoose ayaa la filayaa inuu ka mid noqdo meelaha ay sida weyn u saameyn karto bixitaanka ciidamada, iyadoo daad-gureynno kale la qorsheeyay inay socdaan illaa 4-ta November.
Uganda ayaa waxaa Soomaaliya ka joogay ciidamo tan iyo sanadkii 2007, iyadoo door weyn ka qaadatay howlgalladii Midowga Afrika iyo taageerada ciidamada dowladda Soomaaliya ee la wareegista magaalooyin muhiim ah oo ku yaalla koonfurta dalka.
Bixitaanka ciidamada Uganda ayaa dhaliyey su’aalo cusub oo ku saabsan mustaqbalka howlgalada amni ee Soomaaliya iyo saameynta ay ku yeelan karto xaaladda amni ee dalka oo weli jilicsan.
