Muqdisho (Banaadir24) — Dowladda Uganda ayaa si rasmi ah u billowday qorshaha ay ciidamadeeda ugala baxayso Soomaaliya, kaddib ku dhowaad labaatan sano oo ay qeyb ka ahaayeen howlgallada nabad-ilaalinta ee dalka, sida uu ku warramay wargeyska Daily Monitor ee Uganda.
Taliyaha guud ee ciidamada Uganda (UPDF), Jeneraal Muhoozi Kainerugaba, ayaa xaqiijiyay in ciidamadooda ay bilaabeen ka bixitaanka Soomaaliya, isagoo sheegay in amniga dalka ay ku wareejinayaan walaalahooda Soomaaliyeed.
“Sidii aan ballanqaadnay, waxaan bilownay inaan ciidamadeenna kala baxno Soomaaliya. Kaddib 20 sano oo dhiig badan iyo naf-hurnimo ah, waxaan amniga ku wareejineynaa walaalaheenna Soomaaliyeed,” ayuu Muhoozi ku qoray bartiisa X Khamiistii, 29-kii October.
Go’aankan ayaa imaanaya xilli ay sii kordhayaan caqabadaha dhaqaale ee heysta howlgalka Midowga Afrika ee taageerada iyo xasilinta Soomaaliya (AUSSOM), kaddib markii Mareykanka uu muujiyay inuusan taageeri doonin dib u cusbooneysiinta taageerada howlgalka, halka Qaramada Midoobay ay dhimeyso dhaqaalaha lagu bixiyo howlgalka.
Wargeyska ayaa sidoo kale sheegay in taageerada saadka ee howlgalka ay wajahday caqabado waaweyn, kuwaas oo saameyn ku yeeshay sahayda, shidaalka iyo howlaha ciidamada ku sugan furimaha hore.
Uganda ayaa sanadkii 2007-dii noqotay dalkii ugu horreeyay ee ciidamo u soo dira Soomaaliya, iyadoo muddo ku dhow 20 sano ay ciidamadeedu door weyn ku lahaayeen dagaalladii lagula jiray Al-Shabaab iyo sugidda amniga xarumaha dowladda.
Ka bixitaanka ciidamada Uganda ayaa noqonaya isbeddel weyn oo ku yimid joogitaanka ciidamada shisheeye ee Soomaaliya, iyadoo mas’uuliyadda amniga dalka ay si isa soo taraysa ugu wareegeyso ciidamada qalabka sida ee Soomaaliyeed.
