Wasiir ka tirsan Xukuumadda Soomaaliya oo weerar Afka ah ku qaaday Siyaasiyiinta mucaaradka

Wasiirka Wasaaradda Dekedaha iyo Gaadiidka Badda Soomaaliya, Cabdiqaadir Maxamed Nuur Jaamac, ayaa si kulul uga hadlay mowqifka mucaaradka dalka, isagoo ku eedeeyay in aysan si dhab ah uga faraxsaneyn horumarka ay Soomaaliya sameyneyso.

Wasiirka ayaa sheegay in hadallada mucaaradka laga dheehan karo cabsi ay ka qabaan in dalka uu ka baxo xaaladda faqri, isla markaana uu ka faa’iideysto kheyraadkiisa dabiiciga ah, gaar ahaan shidaalka la filayo in la soo saaro.

“Waxaan aragnaa hadallo muujinaya in aysan jirin rabitaan dhab ah oo ay u qabaan horumarka dalka. Waxaa muuqata cabsi ku saabsan in Soomaaliya ay gaarto isbedel dhaqaale oo weyn,” ayuu yiri wasiirku.

Sidoo kale, wuxuu tilmaamay in qof aan ka welwelin gaajada iyo baahida haysata shacabka, balse diiradda saaraya carqaladeynta horumarka, uusan mudneyn in lagu aamino xil qaran.

Wasiirka ayaa sidoo kale cadeeyay in dowladda aysan aqbali doonin wax kasta oo dibadda laga hagayo oo lagu doonayo in Soomaaliya lagu sii hayo faqri iyo baahi, isagoo xusay in dowladda ay ka go’an tahay horumarinta dalka iyo ka faa’iideysiga kheyraadkiisa.

Hadalkan ayaa imaanaya xilli ay sii kordhayaan doodaha la xiriira mustaqbalka dhaqaalaha dalka iyo suurtagalnimada soo saarista shidaalka, taas oo si weyn u kala aragti duwan yihiin dhinacyada siyaasadda Soomaaliya.