Muqdisho (Banaadir24) — Xiisadda siyaasadeed iyo tan amni ee gobolka Hiiraan ayaa sii xoogeysanaysa, kadib markii la soo sheegay in ciidamo ka tirsan Xoogga Dalka Soomaaliyeed iyo saraakiil ka tirsan Hay’adda Nabad-Sugidda iyo Sirdoonka Qaranka (NISA) ay ka baxeen fariisimihii ay ku sugnaayeen, kuna biireen xoogagga daacadda u ah Ugaas Yuusuf Ugaas Xasan.
Wararka ayaa sheegaya in tallaabadan ay timid saacado kadib baaq culus oo uu jeediyey Ugaaska guud ee beesha Xawaadle, kaas oo ciidamada dowladda ee kasoo jeeda gobolka Hiiraan ugu baaqay inay ka baxaan safafka ciidamada federaalka, ayna u istaagaan difaaca waxa uu ku tilmaamay sharafta, karaamada iyo deegaanada beeshooda.
Baaqan ayaa kusoo beegmaya xilli ay dowladda federaalka Soomaaliya ciidamo dheeraad ah geysay gobolka Hiiraan, halkaas oo ay ku sugan yihiin siyaasiyiin, xildhibaano iyo xubno mucaarad ku ah maamulka Madaxweyne Xasan Sheekh Maxamuud iyo hannaanka dhismaha maamulka Hirshabeelle.
Ka bixitaanka ciidamada iyo ku biiristooda xoogagga uu hoggaamiyo Ugaas Yuusuf ayaa sare u qaadaysa walaaca laga qabo in khilaafka siyaasadeed ee Hiiraan uu isu beddelo iska horimaad amni, gaar ahaan haddii ay sii socdaan dhaq-dhaqaaqyada ciidan ee labada dhinac.
Xaaladda ayaa hadda si gaar ah isha loogu hayaa, iyadoo tallaabada ciidamadaasi ay dhalin karto isbeddel ku yimaada awoodda ciidan ee gobolka, isla markaana sii adkayn karta xiisadda u dhexeysa dowladda federaalka iyo hoggaanka dhaqanka iyo siyaasiyiinta kasoo horjeeda.
