Xaaladda amni ee magaalada Baydhabo ayaa weli cakiran kadib markii ciidamada taageersan Madaxweynaha Koonfur Galbeed Cabdicasiis Xasan Maxamed (Laftagareen) ay la wareegeen qaybo muhiim ah oo magaalada kamid ah, balse saacado kadib dib uga baxeen goobihii ay horay u galeen.
Howlgalka ciidamada Laftagareen ayaa bilowday aroornimadii hore ee Sabtida, markii ay weerar abaabulan ku qaadeen gudaha Baydhabo. Dagaallo culus ayaa ka dhacay xaafado kala duwan, iyadoo rasaas xooggan laga maqlayay inta badan magaalada.
Goobjoogayaal ayaa sheegay in ciidamada weerarka qaaday ay gaareen meelo istaraatiiji ah oo ay ku jiraan agagaarka bartamaha magaalada, taasoo cabsi weyn ku abuurtay shacabka. Ganacsiyo badan ayaa albaabada loo laabay, waddooyinkana waxay noqdeen kuwo maran xilli dadka rayidka ah ay guryahooda ku sugnaayeen.
Wararka soo baxaya ayaa tilmaamay in ciidamadaasi ay ka baxeen goobihii ay horey u qabsadeen. Sababta dib-u-gurashada ayaan wali si rasmi ah loo caddeyn, iyadoo warar kala duwan ay sheegayaan inay la xiriiri karto dib-u-habeyn ciidan, wada-hadallo socda ama iska caabin ay kala kulmeen ciidamada dowladda.
Inkasta oo ciidamadaasi dib uga baxeen gudaha magaalada, haddana dhaq-dhaqaaqyo ciidan ayaa weli laga dareemayaa duleedka Baydhabo, halka rasaas goos-goos ah laga maqlayo meelo kamid ah magaalada. Ciidamada amniga ayaa sidoo kale kordhiyay heeganka ay ku jiraan.
Illaa iyo hadda lama shaacin tirada rasmiga ah ee khasaaraha ka dhashay dagaallada maanta, mana jiro war-saxaafadeed faahfaahsan oo kasoo baxay dhinacyada ku lugta leh iska horimaadyada.
Falanqeeyayaasha siyaasadda ayaa sheegaya in dhacdooyinkan ay muujinayaan heerka sare ee xiisadda siyaasadeed iyo amni ee ka jirta Koonfur Galbeed, iyagoo uga digaya in xaaladdu sii xumaato haddii aan xal siyaasadeed laga gaarin khilaafaadka taagan.
