Wafdi Xildhibaanno ah oo Ka Degay Baydhabo Iyadoo Ay Jirto Xayiraad Dowladda Federaalka Ah
Wafdi ballaaran oo ka kooban xildhibaanno ka tirsan Baarlamaanka Federaalka Soomaaliya ayaa maanta ka degay garoonka diyaaradaha magaalada Baydhabo, iyadoo ay weli jirto xayiraad safar oo horay u soo rogtay dowladda Federaalka.
Wafdigan waxaa hoggaaminaya Guddoomiyihii hore ee Golaha Shacabka, Maxamed Mursal Sheekh Cabdiraxmaan, waxaana sidoo kale ka mid ah Xildhibaan Aadan Maxamed Nuur (Saransoor) iyo Xildhibaan Xasan Cabdinuur.
Ilo xog ogaal ah ayaa xaqiijiyay in wafdigu uu ka soo kicitimay magaalada Nayroobi ee dalka Kenya, hase ahaatee aan si rasmi ah loo xaqiijin waddada saxda ah ee ay soo mareen. Wararka ayaa tilmaamaya in ay gaareen xadka ay wadaagaan Kenya, Soomaaliya iyo Itoobiya, gaar ahaan aagga Mandera, ka hor inta aysan gudaha u soo gelin dalka.
Imaanshaha wafdigan ayaa imaanaya xilli dowladda Federaalka Soomaaliya ay horay u soo saartay amar xayiraad ah oo la xiriira socdaallada qaarkood, balse tallaabadan ayaa muujinaysa in xayiraaddaasi aysan si buuxda u saameyn siyaasiyiinta, iyadoo la sheegayo in culeyska ugu weyn uu saaran yahay dadka rayidka ah ee safarada caadiga ah ku jira.
Weli ma jiro wax war rasmi ah oo ka soo baxay dowladda Federaalka oo ku saabsan socdaalka wafdigan ama sida ay ugu suurtagashay inay dalka soo galaan iyagoo ay jirto xayiraad.
