UNSOS oo Xaraashaysa Qalabkeeda Soomaaliya Xilli Dhaqaale-Yaraantu Cirka Isku Shareertay
Xafiiska Qaramada Midoobay ee Taageerada Soomaaliya (UNSOS) ayaa bilaabay hannaan lagu raadinayo shirkado qaabilaya xaraashka iyo iibinta qaybo ka mid ah hantida ay Qaramada Midoobay ku leedahay Soomaaliya, xilli ay sii xoogeysanayaan walaacyada ku saabsan mustaqbalka maalgelinta hawlgallada taageerada amniga dalka.
Macluumaadka la xiriira hannaanka xaraashka ayaa muujinaya in UNSOS ay doonayso shirkado u qalma iibinta qalab kala duwan oo ay ka mid yihiin gaadiid, kombiyuutarro, matoorro koronto, mashiinno iyo agab la xiriira dhismaha. Waqtiga kama dambaysta ah ee gudbinta codsiyada ayaa lagu sheegay 11-ka Agoosto.
Tallaabadan ayaa kusoo beegmaysa xilli cadaadis dhaqaale uu hareeyay taageerada caalamiga ah ee amniga Soomaaliya iyo maalgelinta howlgalka Midowga Afrika ee dalka ka socda.
Mareykanka ayaa dhowaan qaaday tallaabooyin lagu dhimayo ama lagaga baxayo qaybo ka mid ah maalgelinta hababka taageera hawlgallada amniga caalamiga ah ee Soomaaliya, iyadoo dhinaca kale khilaaf uu weli ka dhex jiro saaxiibada caalamka oo ku saabsan cidda bixinaysa dhaqaalaha lagu sii wadi karo howlgalka Midowga Afrika.
UNSOS ayaa door muhiim ah ka ciyaara taageerada saadka iyo farsamada, oo ay ku jiraan duulimaadyada, gaadiidka, daad-gureynta caafimaadka iyo adeegyo kale oo muhiim u ah ciidamada Midowga Afrika ee Soomaaliya.
Xaraashka la qorsheeyay ayaa dhalin kara su’aalo cusub oo ku saabsan baaxadda mustaqbalka ee howlaha UNSOS. Hase yeeshee, iibinta ama ka takhalusidda qalabku kaligeed ma caddeyneyso in UNSOS ay gebi ahaanba ka baxayso Soomaaliya ama joojinayso taageeradeeda, ilaa Qaramada Midoobay ay si rasmi ah go’aan noocaas ah u shaaciso.
Warar hore ayaa tilmaamay in qaar ka mid ah dowladaha reer Galbeedka aysan weli diyaar u ahayn inay taageeraan qorshayaal cusub oo dhaqaale loogu raadinayo UNSOS iyo howlgalka Midowga Afrika, gaar ahaan kuwa ku lug leh in kharashaad dheeraad ah lagu bixiyo hannaan hoos yimaada Qaramada Midoobay.
Arrintan ayaa cadaadis weyn saaraysa Dowladda Federaalka Soomaaliya, oo weli si weyn ugu tiirsan taageerada saaxiibada caalamka iyo ciidamada Midowga Afrika, xilli ciidamada Soomaaliya ay dagaal kula jiraan Al-Shabaab isla markaana ay si tartiib ah ula wareegayaan masuuliyadda guud ee amniga dalka.
Haddii taageerada saadka ee UNSOS si weyn loo dhimo, saameynta ugu culus waxay ku dhici kartaa adeegyada qaaliga ah sida duulimaadyada, gaadiidka, qalabka iyo taageerada farsamada kuwaas oo dalalka ciidamada ku biiriya howlgalka Midowga Afrika ay ku adkaan karto inay kaligood daboolaan.
Tallaabada xaraashka ayaa kusoo aadaysa xilli Soomaaliya iyo saaxiibadeeda caalamiga ah ay weli raadinayaan dhaqaale joogto ah oo lagu sii wadi karo hawlgallada amniga, iyadoo mustaqbalka taageerada caalamiga ahi uu wajahayo hubanti-la’aan sii kordheysa.
