Dowladda Turkiga ayaa la sheegay inay raadinayso waddo lagu dejiyo xiisadda dagaalka ka dhanka ah Iran, iyadoo la xiriiraysa Mareykanka iyo Tehran si loo bilaabo wadahadallo horseedi kara heshiis suurtagal ah, sida ay ilo xog-ogaal ah u sheegeen warbaahinta Middle East Eye.
Maalintii Axadda, Wasiirka Arrimaha Dibadda Turkiga Hakan Fidan ayaa sameeyay wicitaanno taxane ah oo uu la yeeshay dhiggiisa Iran, Masar iyo dalal Yurub ah, si looga hadlo tallaabooyin lagu soo afjarayo colaadda, sida ay xaqiijiyeen ilo ka tirsan wasaaradda arrimaha dibadda Turkiga.
Isla maalintaas, Fidan ayaa sidoo kale la hadlay saraakiil sare oo ka tirsan Mareykanka, kuwaas oo la rumeysan yahay inay ku jiraan ergayada Steven Witkoff iyo Jared Kushner.
Intii lagu guda jiray Axaddii, wasiirku waxa uu sidoo kale wadahadallo la yeeshay dhiggiisa dalalka Sacuudi Carabiya, Qatar, Ciraaq iyo Pakistan, iyagoo “qiimeynayay hindisayaal” lagu joojin karo dagaalka, sida ay ilo-wareedyadu sheegeen.
Ilo ku dhow aragtida Ankara ayaa sheegay in Turkigu uu riixayo xabbad joojin kooban oo ku meel gaar ah, si fursad loogu helo wadahadallo rasmi ah.
Dhanka kale, Madaxweynaha Mareykanka Donald Trump ayaa Isniintii sheegay in Washington ay wado “wadahadallo wax ku ool ah” oo lagu doonayo in lagu soo afjaro colaadaha Bariga Dhexe, kadib markii uu hore uga digay inuu beegsan karo kaabayaasha tamarta Iran sababo la xiriira xannibaadda marin biyoodka Hormuz.
Trump ayaa sidoo kale amar ku bixiyay in Wasaaradda Difaaca Mareykanka (Pentagon) dib loo dhigo weerarro kasta oo lala beegsanayo kaabayaasha tamarta Iran muddo shan maalmood ah, isaga oo intaas ku daray in wadahadalladu ay sii socon doonaan toddobaadka oo dhan.
Dhinaca kale, Hakan Fidan ayaa dhammaadkii toddobaadka u sheegay suxufiyiinta in Ankara ay ka fiirsaneyso suuragalnimada xabbad joojin ku meel gaar ah oo gaaban, taasoo siinaysa dhinacyada fursad ay ku wadahadlaan inkastoo ay jiri karto in dagaalka dib loo bilaabo haddii wadaxaajoodyadu fashilmaan.
