Taliyihii Sirdoonka Ilaalada Kacaanka Iran oo la dilay
Dowladda Iran ayaa xaqiijisay in la dilay taliyihii sare ee sirdoonka Ciidanka Ilaalada Kacaanka Iran (IRGC), kaddib duqeymo culus oo ay si wadajir ah u fuliyeen Mareykanka iyo Israa’iil gudaha caasimadda Tehran.
Warbaahinta dowladda Iran ayaa sheegtay in Maj. Gen. Majid Khademi, oo ahaa madaxa hay’adda sirdoonka ee IRGC, uu ku dhintay weerarkaasi, inkasta oo aan si faahfaahsan loo shaacin goobta saxda ah iyo sida uu weerarku u dhacay.
Dhinaca kale, Israa’iil ayaa si cad u sheegatay mas’uuliyadda weerarka, iyadoo wasiirka difaaca dalkaas uu sheegay in la bartilmaameedsaday saraakiil sare oo ka tirsan nidaamka Iran, isla markaana la sii wadi doono beegsiga hoggaanka militariga Iran.
Wararka ayaa tilmaamaya in duqeymahan ay sababeen dhimashada in ka badan 25 qof, iyadoo ay ku jiraan saraakiil iyo dad rayid ah, taasoo sii kordhisay xiisadda colaadeed ee u dhexeysa Iran, Mareykanka iyo Israa’iil.
Iran ayaa dhankeeda ku hanjabtay jawaab adag, iyadoo sheegtay in weerarrada noocan ah ay horseedi karaan “cawaaqib halis ah” oo ka dhaca gobolka Bariga Dhexe.
