Somaliland oo qaylo dhan kasoo saartay halis kusoo wajahan & Warbaahinta Israa’iil oo…
Mas’uuliyiinta Somaliland ayaa muujiyay walaac sii kordhaya oo ku saabsan suurtagalnimada in dhulkooda uu noqdo bartilmaameed ay weerarro ka geystaan kooxda Xuutiyiinta Yemen, iyadoo ay sii xoogaysanayaan xiisadaha dagaal ee gobolka, sida ay werisay warbaahinta dowladda Israa’iil.
Warbixin uu baahiyay telefishinka Israa’iil ee Kan ayaa sheegtay in walaacaasi uu sii kordhay kaddib markii Israa’iil si rasmi ah u aqoonsatay Somaliland. Mas’uuliyiin ka tirsan maamulka Somaliland ayaa sidoo kale ka baqaya in dowladda Soomaaliya ay isku daydo inay ku dhiirrigeliso Xuutiyiinta inay weerarro ka fuliyaan Somaliland, taasoo qayb ka noqon karta loollanka ballaaran ee ka dhashay khilaafka u dhexeeya xulafada gobolka iyo Iran.
Sarkaal ka tirsan Somaliland ayaa u sheegay Kan in maamulkiisu si buuxda uga warqabo khatartaas isla markaana uu isku diyaarinayo, hase yeeshee uu qiray in awoodda difaaca ee Somaliland ay weli xaddidan tahay. Wuxuu tilmaamay in gaar ahaan ay jirto baahi weyn oo loo qabo nidaamyo difaac oo hawada ah oo awood u leh inay qabtaan ama joojiyaan weerarro suurtagal ah.
Kooxda Xuutiyiinta Yemen ayaa hore ugu hanjabtay inay beegsan doonaan goob kasta oo ay ku sugan yihiin ama xiriir la leh Israa’iil oo ku taal Somaliland. Toddobaadkii hore ayaa sidoo kale la sheegay in Xuutiyiintu ka fiirsanayaan inay weeraraan bartilmaameedyo Israa’iil la xiriira oo juqraafi ahaan u dhow Yemen, kuwaas oo ay ka mid noqon karto qaybo ka mid ah Geeska Afrika.
Dhanka kale, wariye ku sugan magaalada Sanca ee caasimadda Yemen oo ay gacanta ku hayaan Xuutiyiinta ayaa sheegay in ku biirista kooxdaasi ee colaadda gobolka ay u muuqato mid waqti uun sugaysa. Si kastaba ha ahaatee, wuxuu xusay in shacabka Yemen ay aad uga daaleen sannado badan oo dagaal ah.
Wariyaha ayaa intaa ku daray in Xuutiyiintu si dhow ula socdaan isbeddellada xaaladda gobolka, isla markaana ay falanqeynayaan khaladaadkii hore uga dhacay jihooyinka dagaalka, si ay uga fogaadaan inay mar kale ku dhacaan guuldarrooyinkii ka dhacay wareegyada hore ee dagaallada.
