Muqdisho (Banaadir24) – Kulan xasaasi ah oo u dhexeeya xubnaha mucaaradka siyaasadeed iyo taliyayaasha ciidamada qalabka sida ee Soomaaliya ayaa maanta ka furmay magaalada Muqdisho, iyadoo diiradda lagu saarayo xaaladda siyaasadeed iyo amniga dalka.
Kulankan oo ah kii ugu horreeyay ee noociisa ah ayaa ka dhacaya hoyga uu magaalada Muqdisho ka deggen yahay musharrax madaxweyne ahna Ra’iisul Wasaarihii hore ee Soomaaliya, Eng. Maxamed Xuseen Rooble.
Shirka waxaa ka qeybgalaya xubnaha mucaaradka, halka dowladda Federaalka ay ku matalayaan taliyeyaasha ciidamada kala duwan, oo ay ka mid yihiin Taliyaha Ciidanka Xoogga Dalka, Taliyaha Booliska, Taliyaha Hay’adda Nabad-Sugidda iyo Sirdoonka Qaranka (NISA), iyo Guddoomiyaha Maxkamadda Darajada Koowaad ee Ciidamada Qalabka Sida.
Ilo xog-ogaal ah ayaa xaqiijiyay in dalabka kulankan uu ka yimid dhinaca taliyeyaasha ciidamada, kuwaas oo doonaya in ay mucaaradka kala hadlaan xaaladda dalka, gaar ahaan arrimaha mudnaanta u leh amniga iyo xasilloonida Soomaaliya.
Sidoo kale, kulanka ayaa la filayaa in looga hadlo khilaafka siyaasadeed ee taagan, marxaladda kala-guurka siyaasadeed ee dalka galay iyo sidii dhinacyadu u gaari lahaayeen isfaham ku saabsan arrimaha masiiriga ah ee dalka.
Kulankan ayaa imanaya xilli ay Soomaaliya wajahayo xaalad siyaasadeed oo xasaasi ah, waxaana indhaha lagu hayaa natiijada wada-hadalladan iyo farriinta ay dhinacyadu ka soo saari doonaan.
Waa markii ugu horreysay oo mucaaradka iyo hoggaanka sare ee ciidamada qalabka sida ay kulan noocan ah yeeshaan, taasoo kulanka siinaysa muhiimad siyaasadeed oo gaar ah.
