Shirkadda Maraakiibta Maersk oo si lama filaan ah u joojisay ganacsigii Dekedda Berbera
Shirkadda maraakiibta caalamiga ah ee Maersk ayaa Isniintii ku dhawaaqday inay si ku-meel-gaar ah u joojisay qaadashada dalabaadyada cusub ee badeecadaha u socda iyo kuwa ka imanaya Dekedda Berbera, taas oo si lama filaan ah u hakisay dhaqdhaqaaqii ganacsi ee dekeddaasi.
War-saxaafadeed ay shirkaddu u dirtay macaamiisheeda ayay ku sheegtay in go’aankan uu dhaqan galay isla markiiba, isla markaana uu yahay mid ku meel gaar ah.
“Waxaan idinla socodsiineynaa in, laga bilaabo hadda, iyo sababo la xiriira isbeddel ku yimid jadwalka maraakiibta, ay shirkaddu si ku-meel-gaar ah u joojisay qaadashada dalabaadyada cusub ee u socda kana imanaya Dekedda Berbera,” ayay tiri Maersk.
Maersk ma aysan bixin faahfaahin dheeraad ah oo ku saabsan waxa sababay isbeddelka jadwalka, taasoo keentay in ganacsatada iyo macaamiishu ay waayaan sabab cad oo ka dambeysa tallaabadan.
Si kastaba ha ahaatee, hakintan lama filaanka ah ayaa kusoo beegmeysa xilli ay jirto xasillooni darro ballaaran oo ka jirta gaadiidka badda ee gobolka, iyadoo shirkadaha maraakiibta ee ka howlgala Geeska Afrika, Badda Cas iyo Gacanka Cadmeed ay la tacaalayaan carqalado soo noqnoqda iyo isbeddello ku yimaada jadwalada.
