Senator Cabdi Ismaaciil Samatar oo ku baaqay in la soo afjaro faragelinta shisheeye ee Soomaaliya.
Senator Cabdi Ismaaciil Samatar oo ka tirsan Aqalka Sare ee Baarlamaanka Federaalka Soomaaliya, ayaa naqdin adag u jeediyay doorka Midowga Afrika iyo Beesha Caalamka ay ku leeyihiin arrimaha Soomaaliya, isagoo ku sifeeyay faragelintooda mid “caqabad ku noqotay” dib-u-soo-kabashada qaranka.
Senator Samatar waxa uu sheegay in faragelintii caalamiga ahayd ee soo bilaabatay sanadkii 2006 ay dalka dhaxalsiisay daciifnimo iyo dib-u-dhac. Waxa uu ku dooday in taageerada caalamiga ah ay xoojisay nidaamka qabaa’ilka ku dhisan, taasna ay wiiqday dadaalladii ay Soomaalidu horumuudka ka ahayd ee lagu dhisayay dowladnimo adag.
Isagoo ka hadlayay doorka ciidamada Midowga Afrika, Senator Samatar ayaa ku sifeeyay shaqada ay AU ka hayso dalka mid u muuqata “khiyaano,” maadaama muddo dheer ka dib aysan weli guul dhab ah ka gaarin nabadaynta dalka. Waxa uu carrabka ku adkeeyay in joogitaanka ciidamo shisheeye ay fursad u diidday in Soomaalidu ay iyadu mas’uuliyadda amnigeeda la wareegto.
Qorshaha uu soo bandhigay Senator-ka ayaa u qornaa sidatan:
In la dejiyo qorshe cad oo muddo shan sano ah ay ciidamada AMISOM (ATMIS) kaga baxayaan dalka.
In Beesha Caalamku ay joojiso taageerada maamulada ku dhisan habka qabiilka ee kala qaybinaya bulshada.
In la dhiirrigeliyo nidaam siyaasadeed oo ay Soomaalidu leedahay, kaas oo ka madax-bannaan fara-gelin dibadeed.
Inkastoo ciidamada Midowga Afrika ay dalka u joogaan la dagaallanka kooxda Al-Shabaab, haddana hadalka Senator Samatar ayaa kusoo beegmaya xilli ay dalka ka jirto dood xooggan oo ku saabsan waxtarka ciidamada shisheeye, maadaama kooxda Al-Shabaab ay weli gacanta ku hayso deegaanno ballaaran.
