Sawirro:- Guddoomiye Aadan Madoobe oo la kulmay Xildhibaano mucaaradsanaa kuna qanciyay qabsoomida…
Guddoomiyaha Golaha Shacabka Baarlamaanka Federaalka Soomaaliya (BJFS), Mudane Sheekh Aadan Maxamed Nuur (Aadan Madoobe), ayaa kulan gaar ah la yeeshay qaar kamid ah xildhibaannada matala deegaanada Dowlad Goboleedka Koonfur Galbeed, iyadoo kulankaas diiradda lagu saaray arrimaha doorashooyinka iyo mustaqbalka siyaasadeed ee gobolka.
Kulankan oo ka dhacay magaalada Muqdisho ayaa waxaa ka qeyb galay xildhibaanno horey loogu yaqaanay inay taageero weyn u hayeen Madaxweynihii hore ee Koonfur Galbeed, isla markaana si cad uga soo horjeeday qabashada doorasho qof iyo cod ah oo ka dhacda deegaanada maamulkaas.
Sida ay sheegayaan ilo xog ogaal ah, Guddoomiye Aadan Madoobe ayaa xildhibaannada kala hadlay muhiimadda ay leedahay in la hirgeliyo nidaamka doorasho ee qof iyo cod, kaas oo loo arko mid horseedi kara hannaan dimuqraadiyadeed oo hufan, kana tarjuma rabitaanka shacabka ku nool Koonfur Galbeed.
Wararka la helayo ayaa sidoo kale tilmaamaya in Guddoomiyuhu ku guuleystay inuu qanciyo inta badan xildhibaannadii kulanka ka qeyb galay, si ay u taageeraan hirgelinta doorasho qof iyo cod ah oo si nabad ah uga dhacda guud ahaan degmooyinka Koonfur Galbeed.
Dhinaca kale, waxaa isa soo taraya warar sheegaya in Guddoomiye Aadan Madoobe uu damac siyaasadeed ka leeyahay hoggaanka Koonfur Galbeed, iyadoo la rumeysan yahay inuu yahay musharax u taagan xilka Madaxweynaha Dowlad Goboleedkaas. Arrintan ayaa la sheegay inay qeyb ka tahay dadaallada uu ku doonayo inuu ku kasbado taageerada siyaasiyiinta iyo xildhibaannada kasoo jeeda deegaannadaas.
Falanqeeyayaasha siyaasadda ayaa aaminsan in haddii xildhibaannadii hore uga soo horjeeday doorashada qof iyo cod ay hadda u janjeeraan taageeradeeda, ay taasi muujin karto isbeddel weyn oo ku yimid jihada siyaasadeed ee Koonfur Galbeed, isla markaana saameyn ku yeelan karta doorashooyinka soo socda.
Ugu dambeyn, kulanka Guddoomiyaha Golaha Shacabka uu la yeeshay xildhibaannadan ayaa lagu tilmaamay mid muhiim u ah dadaallada lagu doonayo in Koonfur Galbeed ay ka gudubto nidaamka doorashooyinka dadban una gudubto doorasho toos ah oo ay shacabka si buuxda uga qeyb qaataan.
