Waxaa maanta oo taariikhdu tahay 15-ka May 2026 ku eg muddo xileedkii dastuuriga ahaa ee Madaxweynaha Soomaaliya Hassan Sheikh Mohamud, iyadoo dalka uu wajahayo xaalad siyaasadeed oo aad u xasaasi ah.
Mucaaradka dowladda Federaalka, qaar kamid ah maamul goboleedyada iyo siyaasiyiin hore ayaa muddooyinkii dambe si isdaba joog ah u sheegayay in muddo xileedka madaxweynaha uu si rasmi ah maanta u dhammaanayo, islamarkaana aan la aqbali doonin muddo kororsi aan heshiis siyaasadeed lagu dhisin.
Doodda ugu weyn ayaa ka taagan sharciyadda sii joogitaanka dowladda, maadaama aan weli la isku raacin hannaan doorasho oo mideysan. Dowladda Federaalka ayaa dhankeeda horay u sheegtay inay waddo qorshaha doorasho qof iyo cod ah, halka mucaaradka iyo qaar kamid ah dowlad goboleedyada ay ku baaqeen shir siyaasadeed loo dhan yahay si xal looga gaaro kala guurka siyaasadeed.
Magaalada Muqdisho gaar ahaan Xerada Xalane ayaa waxaa ka socdaan dadaallo ay wadaan wakiillo caalami ah oo lagu doonayo in looga hortago qalalaase siyaasadeed iyo isku dhac ka dhasha muranka doorashooyinka.
Wararkii ugu dambeeyay ee aan ka helnay ilo ku sugan goobta uu shirku ka socdo ayaa waxay sheegayaan in dhinacyada dowladda iyo mucaaradka ay isku soo dhawaanayaan islamarkaana ay ka heshiiyeen waxyaabaha qaar halka maanta loo balansanyahay inuu shirku sii socdo.
