Mucaaridka dowladda Federaalka Soomaaliya ee ku sugan magaalada Muqdisho ayaa maanta si rasmi ah u guda-galay dood ku saabsan nooc doorasho oo cusub, kaas oo lagu tilmaamay mid “dhexe” oo ka duwan labadii nidaam ee horey loo soo maray—doorashadii dadbaneyd ee sanadkii 2022 iyo nidaamka “qof iyo cod” ee uu doonayo Madaxweynaha Jamhuuriyadda Federaalka Soomaaliya, Xasan Sheekh Maxamuud.
Kulanka mucaaridka oo maanta ka socda caasimadda ayaa diiradda lagu saaraya sidii loo heli lahaa hannaan doorasho oo ay ku mideysan yihiin dhinacyada siyaasadda dalka, iyadoo la tixgelinayo duruufaha amni, siyaasadeed iyo farsamo ee haatan jira. Wararka ayaa sheegaya in siyaasiyiinta mucaaridka ay isku dayayaan inay ka soo saaraan kulankooda hal aragti oo mideysan, si ay ugu gudbiyaan ergada Beesha Caalamka ee ku howlan dhexdhexaadinta.
Hindisaha cusub ee mucaaridka ayaa la sheegay inuu noqon karo isku dhaf u dhexeeya doorasho dadban iyo mid dadweyne, taas oo lagu qancin karo dhinacyada kala duwan ee siyaasadda. Qorshahan ayaa ujeedkiisu yahay in laga fogaado khilaaf hor leh oo sababi kara dib u dhac ku yimaada geeddi-socodka doorashooyinka dalka.
Ilo ku dhow kulanka ayaa sheegaya in nooca doorasho ee laga doodayo uu siinayo door muuqda dowlad-goboleedyada iyo odayaasha dhaqanka, isla markaana uu furayo waddo u suurtagelin karta in mustaqbalka loo gudbo nidaam qof iyo cod ah.
Ergada Beesha Caalamka, oo maalmahan waday kulamo kala duwan oo ay la yeesheen Madaxweynaha iyo mucaaridka, ayaa si cad u muujiyay walaacooda ku aaddan waqtiga kooban ee harsan ka hor dhammaadka muddo-xileedka Madaxweynaha oo ku eg 15-ka May.
Waxay dhinacyada siyaasadda ku boorriyeen inay si degdeg ah u bilaabaan wadahadallo wax ku ool ah, isla markaana ay ku heshiiyaan hannaan doorasho oo la isla oggol yahay si looga fogaado qalalaase siyaasadeed.
Mucaaridka ayaa la filayaa inay maanta ama maalmaha soo socda ku dhawaaqaan go’aan mideysan oo ku saabsan nooca doorasho ee ay taageersan yihiin. Haddii ay ku guuleystaan inay hal aragti isku raacaan, waxay taasi sahli kartaa in wadaxaajoodyo rasmi ah lala yeesho dowladda Federaalka.
