Mucaaradka oo abaabulkii ugu weynaa ee bannaanbaxa ka wada Muqdisho
Madasha Mucaaradka Soomaaliyeed ayaa la sheegay inay sare u qaaday dhaqdhaqaaqyadeeda siyaasadeed ee magaalada Muqdisho, iyadoo ay socdaan diyaar-garowyo la xiriira bannaanbaxyo la qorsheeyay in lagu qabto caasimadda 6-da June.
Sida ay sheegayaan warar iyo ilo kala duwan oo xog-ogaal ah, hoggaamiyeyaal caan ah oo ka tirsan mucaaradka Soomaaliya, oo ay ku jiraan Sheekh Shariif Sheekh Axmed iyo Xasan Cali Khayre, ayaa la sheegay inay isbeddel ku sameeyeen goobihii ay hore uga deganaayeen Muqdisho, iyagoo u wareegay xaafado iyo deegaano kale oo magaalada ku yaalla.
Ilo ku dhow dhinacyada mucaaradka ayaa tilmaamaya in tallaabadan ay qayb ka tahay qorshe ballaaran oo abaabul iyo isku dubbarid ah oo lagu diyaarinayo bannaanbaxyada la filayo inay ka dhacaan Muqdisho maalmaha soo socda.
Wararka ayaa intaa ku daraya in kulamo iyo wada-tashiyo kala duwan ay maalmihii ugu dambeeyay ka socdeen magaalada, kuwaas oo lagu lafagurayay habraaca iyo qaabka loo qabanayo isu-soo-baxyada.
Bannaanbaxyadan la qorsheynayo ayaa imaanaya xilli uu dalka ku jiro marxalad siyaasadeed oo xasaasi ah, iyadoo ay jiraan dooddo iyo kala aragti duwanaansho ku saabsan arrimaha doorashooyinka, amniga, maamulka dalka iyo hannaanka dowlad-dhiska. Madaxda mucaaradka ayaa marar badan dowladda ku eedeeyay inay ku guuldareysatay wax ka qabashada qaar ka mid ah caqabadaha siyaasadeed iyo kuwa amni ee dalka ka jira.
Dhinaca kale, weli ma jirto war rasmi ah oo kasoo baxay hay’adaha amniga iyo maamulka gobolka Banaadir oo ku saabsan qabanqaabada bannaanbaxyada la qorsheeyay ama tallaabooyinka lagu xaqiijinayo amniga shacabka iyo ka qaybgalayaasha isu-soo-baxyada.
