Hay’adaha ammaanka ayaa gacanta ku dhigay Cabdikariim Cabdullaahi Ciidle, oo 42 jir ah, kaas oo dowladda Mareykanka ku eedeysay inuu ka mid ahaa maskaxdii ka dambeysay musuq-maasuqii weynaa ee loo yaqaanay Feeding Our Future.
Waaxda Caddaaladda Mareykanka ayaa sheegtay in Cabdikariim lagu qabtay magaalada Muqdisho 25-kii Juun 2026, kadib muddo uu baxsad ku ahaa. Dowladda Mareykanka ayaa ku eedeysay inuu ka cararay dalka si uu uga fogaado maxkamadeynta.
Sida ku cad dacwadda, Cabdikariim wuxuu ka tirsanaa shaqaalaha hay’addii Feeding Our Future, halkaas oo lagu eedeeyay inuu laaluush iyo lacagaha dib-u-celinta ka qaadan jiray dad doonayay in loo ansixiyo xarumo si been abuur ah uga faa’iideysta Barnaamijka Nafaqeynta Carruurta ee dowladda federaalka.
Dacwad oogayaasha ayaa sidoo kale ku andacoonaya inuu sameystay shirkado iyo xarumo magacyo kale ku qoran, isagoo ku sheegay si been abuur ah inay maalin kasta cunto siinayeen kumannaan carruur ah. Lacagahaas ayaa la sheegay inuu u adeegsan jiray shirkado been abuur ah si uu u qariyo halka ay ka yimaadeen.
Waaxda Caddaaladda Mareykanka ayaa sheegtay in in ka badan $5 milyan oo doolar oo ka mid ah lacagihii musuq-maasuqa lagu shubay akoonno lala xiriirinayo shirkadaha uu sameystay.
Mas’uuliyiinta Mareykanka ayaa ku tilmaamay Cabdikariim inuu ahaa shaqsi muhiim ah oo ku lug lahaa mid ka mid ah kiisaskii musuq-maasuqa ee ugu waaweynaa taariikhda gobolka Minnesota, iyagoo xusay in qabashadiisu muujineyso in cid kasta oo lagu eedeeyo khiyaano lacageed ay wajihi doonto cadaalad, meel kasta oo ay isku daydo inay ku dhuumato.
