Maleeshiyada Al-Shabaab oo Gubay 10 Gaari oo Dhuxul Siday
Warar hordhac ah ayaa sheegaya in dagaalyahanno ka tirsan Al-Shabaab ay jidka isku xira degmooyinka Wanlaweyn iyo Afgooye ee gobolka Shabeellaha Hoose ku gubeen 10 gaari oo siday dhuxul.
Sida wararku tilmaamayaan, gaadiidka ayaa lagu qabtay wadada oo ah marin ganacsi oo muhiim ah, iyadoo maleeshiyaadka hubeysan ay darawallada ku amreen inay gawaarida ka degaan, kadibna ay dab qabadsiiyeen gaadiidka iyo xamuulka saarnaa.
Wax khasaare ah oo nafeed ah lama soo sheegin, hase yeeshee xaaladda darawalladii gawaarida ayaan weli si rasmi ah loo xaqiijin.
Al-Shabaab ayaa horey u beegsatay gaadiidka ganacsiga ee dhuxusha qaada, gaar ahaan kuwa lagu eedeeyo inay diidaan bixinta lacago ay kooxda ku soo rogtay ama jebiyaan xayiraadaha ay ka dhaqan geliso deegaannada ay saameynta ku leedahay.
Dhacdadan ayaa ku soo beegmaysa iyadoo kooxda Al-Shabaab ay muddo dheer adeegsanaysay nidaam canshuureed iyo lacago baad ah oo laga qaado ganacsatada, gaadiidleyda iyo bulshada ku nool deegaannada ay saameynta ku leedahay.
Wanlaweyn ayaa ka mid ah goobaha muhiimka ah ee dhuxusha laga soo saaro, halka wadada isku xirta Wanlaweyn, Afgooye iyo Muqdisho ay tahay marin muhiim u ah isu-socodka badeecooyinka iyo gaadiidka ganacsiga.
Gubista 10-ka gaari ayaa laga cabsi qabaa inay saameyn ku yeelato ganacsatada dhuxusha iyo gaadiidleyda, iyadoo darawallada mara waddooyinka koonfurta Soomaaliya ay si joogto ah ula kulmaan isbaarooyin sharci-darro ah, baad, afduub iyo weerarro.
Dhacdooyin la mid ah ayaa hore uga dhacay Shabeellaha Hoose, waxaana Al-Shabaab sanadihii hore dhowr jeer lagu eedeeyay inay gubeen gaadiid dhuxul siday kadib markii ay ku qabteen waddooyinka gobolka.
Warbixinno hore oo laga sameeyay ganacsiga dhuxusha Soomaaliya ayaa sidoo kale xusay in gaadiidleydu ay la kulmaan garaacis, afduub iyo in gawaaridooda la gubo marka ay maraan isbaarooyinka ay kooxda maamusho.
Dhacdadan cusub ayaa muujinaysa khatarta sii wajahaysa gaadiidleyda iyo ganacsatada isticmaala waddooyinka isku xira deegaannada wax-soo-saarka iyo suuqyada waaweyn ee koonfurta Soomaaliya.
