Muqdisho (Banaadir24) — Muuse Salaad, oo maalmo ka hor loo magacaabay guddoomiyaha cusub ee gobolka Hiiraan ee maamulka Hirshabeelle, ayaa iska casilay xilka, taas oo kusoo beegantay xilli ay gobolka ka taagan tahay xiisad siyaasadeed oo xooggan.
Wararka ayaa sheegaya in Muuse Salaad uu hadda ku sugan yahay hoyga Ugaas Yuusuf Ugaas Xasan, oo ah hoggaamiye dhaqameed awood ku leh gobolka Hiiraan, halkaas oo ay ka socdaan kulamo iyo wadatashiyo siyaasadeed.
Is-casilaadda Muuse Salaad ayaa timid isla maalinta caleema-saarka madaxweynaha Hirshabeelle, Cali Cabdullaahi Xuseen (Cali Guudlaawe), kaas oo lagu qabtay magaalada Jowhar.
Muuse Salaad ayaa xilka loo magacaabay maalmo kooban kahor, isagoo beddelay guddoomiyihii hore oo diiday inuu hoos yimaado maamulka Hirshabeelle, islamarkaana garab istaagay Ugaaska iyo xubno ka tirsan bulshada gobolka oo tabashooyin muddo dheer ka qabay maamulka.
Dhanka kale, waxaa la sheegayaa in hoyga Ugaas Yuusuf ay ka socdaan kulamo siyaasadeed oo xasaasi ah, iyadoo la filayo in saacadaha soo socda ay kasoo baxaan go’aanno saameyn ku yeelan kara xaaladda siyaasadeed iyo maamulka gobolka Hiiraan.
Is-casilaaddan ayaa kusoo beegmaysa xilli ay sii xoogeysanayaan khilaafaadka siyaasadeed ee Hiiraan, waxaana soo baxaya su’aalo ku saabsan awoodda dowladda Federaalka iyo maamulka Hirshabeelle ee ku aaddan maamulidda gobolka.
