Madaxweynaha Soomaaliya, Xasan Sheekh Maxamuud, ayaa maanta ka qeybgalaya munaasabad ballaaran oo lagu qabanayo Dekedda weyn ee Muqdisho, taas oo lagu soo dhaweynayo markabka Cagri Bey oo si rasmi ah u bilaabaya howlaha qodista ceelasha shidaalka ee Soomaaliya.
Markabkan oo shalay kusoo xirtay dekedda Muqdisho ayaa la filayaa inuu door muhiim ah ka qaato sahaminta iyo qodista kheyraadka shidaalka, arrin muddo dheer ay sugayeen shacabka Soomaaliyeed.
Munaasabadda soo dhaweynta ayaa waxaa ka qeybgalaya madax sare oo ka tirsan dowladda federaalka, masuuliyiin ka socota dowladda Turkiga, iyo marti sharaf kale oo heer caalami ah.
Amniga magaalada Muqdisho, gaar ahaan degmooyinka ku dhow dekedda, ayaa si weyn loo adkeeyay. Ciidamada ammaanka ayaa xiray waddooyinka muhiimka ah ee gala iyo kuwa ka baxa dekedda si loo xaqiijiyo badqabka madaxda iyo martida ka qeybgaleysa munaasabadda.
Inta lagu guda jiro munaasabadda, Madaxweyne Xasan Sheekh Maxamuud iyo masuuliyiin kale ayaa la filayaa inay khudbado ka jeediyaan halkaas, iyagoo si gaar ah uga hadli doona marxaladihii kala duwanaa ee uu soo maray heshiiska shidaal qodista ee lala galay dowladda Turkiga. Heshiiskan ayaa loo arkaa mid istaraatiiji ah oo fure u noqon kara horumarka dhaqaalaha dalka, haddii si hufan loo maareeyo.
Sidoo kale, masuuliyiinta ayaa tilmaamaya in bilaabista qodista shidaalka ay Soomaaliya u horseedi karto koboc dhaqaale, shaqo abuur, iyo xoojinta miisaaniyadda dowladda, inkastoo ay jiraan caqabado u baahan in si taxaddar leh loo wajaho, sida amniga, ilaalinta deegaanka, iyo hufnaanta maamulka kheyraadka.
Ugu dambeyn, munaasabaddan ayaa muujineysa dadaallada dowladda federaalka ee ku aaddan ka faa’iideysiga kheyraadka dabiiciga ah ee dalka, iyadoo la rajeynayo in mashruucan uu noqdo mid horseeda isbeddel dhab ah oo dhinaca dhaqaalaha ah.
