Warar isa soo taraya ayaa sheegaya in dowladda Turkiga, gaar ahaan Madaxweynaha Recep Tayyip Erdoğan, ay magaalada Ankara ku martiqaadday qaar ka mid ah siyaasiyiinta iyo xubnaha mucaaradka Soomaaliya si looga wada hadlo xaaladda siyaasadeed ee dalka iyo sidii loo heli lahaa isfaham siyaasadeed oo ballaaran.
Ilo xog ogaal ah ayaa tilmaamaya in Turkigu uu carrabka ku adkeeyay in xiriirka iyo joogitaankiisa Soomaaliya aanu ku xirnayn shaqsi gaar ah ama dowladda hadda jirta oo keliya, balse uu salka ku hayo danaha shacabka Soomaaliyeed, xasilloonida gobolka, iyo taageeridda hannaan siyaasadeed oo loo dhan yahay.
Sida ay wararku sheegayaan, Ankara waxay doonaysaa inay door firfircoon ka qaadato dadaallada lagu xallinayo khilaafaadka siyaasadeed ee Soomaaliya, iyadoo la dhiirrigelinayo wada-hadal iyo isu soo dhowaansho dhex mara madaxda dowladda federaalka iyo siyaasiyiinta mucaaradka.
Wararka la helayo ayaa sheegaya in kulamada iyo wada-hadallada Ankara ay qeyb ka yihiin siyaasiyiin caan ah oo Soomaaliyeed, kuwaas oo ay ka mid yihiin:
- Ra’iisul Wasaarihii hore ee Soomaaliya, Mohamed Hussein Roble, oo haatan ku sugan Turkiga.
- Agaasimihii hore ee Hay’adda NISA, Fahad Yasin Haji Dahir, oo isna lagu soo warramayo inuu ku sugan yahay Ankara.
- Cabdinaasir Shubka, Xoghayaha Maaliyadda Xisbiga Himilo Qaran, oo kamid ah xubnaha siyaasadeed ee ku sugan Turkiga.
Ilo diblomaasiyadeed ayaa sheegaya in kulamadan ay diiradda saarayaan arrimo ay ka mid yihiin xaaladda siyaasadeed ee Soomaaliya, doorashooyinka la filayo, amniga guud ee dalka, iyo sidii loo abuuri lahaa jawi siyaasadeed oo deggan.
Dowladda Turkiga ayaa sanadihii u dambeeyay noqotay mid kamid ah saaxiibbada ugu dhow ee Soomaaliya, iyadoo taageero ka geysatay dhinacyada amniga, dib-u-dhiska, caafimaadka, waxbarashada iyo horumarinta kaabeyaasha dhaqaalaha.
Ankara ayaa sidoo kale door muhiim ah ka ciyaartay tababarka ciidamada Soomaaliya iyo mashaariic horumarineed oo laga hirgeliyay Muqdisho iyo gobollo kale oo dalka kamid ah.
