Maamulka Koonfur Galbeed oo sheegay inay gacanta ku dhigeen Nin Bam ku tuuray Xarunta Xisbiga JSP
Wasiirka Amniga Dowlad Goboleedka Koonfur Galbeed Soomaaliya, Mudane Joon, ayaa faahfaahin ka bixiyay shir muhiim ah oo looga hadlay xaaladda amniga guud ee Koonfur Galbeed, kaas oo ka dhacay magaalada Baydhabo.
Wasiir Joon ayaa sheegay in hay’adaha amniga ee Koonfur Galbeed ay gacanta ku hayaan eedeysane lagu tuhunsan yahay inuu bam ku tuuray mid ka mid ah xarumaha uu ku shaqeeyo ururka siyaasadeed ee JSP ee magaalada Baydhabo.
Wuxuu xusay in kiiskan uu yahay mid si weyn loo baarayo, isla markaana ay socdaan dadaallo dheeraad ah oo lagu xaqiijinayo dhammaan faahfaahinta la xiriirta dhacdadaas.
Wasiirku wuxuu sidoo kale carrabka ku adkeeyay in eedeysanaha la horgeyn doono sharciga, si loo waafajiyo habraacyada cadaaladda iyo sugidda amniga guud ee shacabka.
Dhanka kale, Wasiirka Amniga ayaa sheegay in dowladdu ay sii xoojin doonto dadaallada lagu ilaalinayo amniga magaalada Baydhabo iyo guud ahaan deegaanada Koonfur Galbeed, si looga hortago falalka amni darrada ah ee wax u dhimaya xasilloonida gobolka.
Shirka amniga ee ka dhacay Baydhabo ayaa diiradda lagu saaray xaaladda guud ee amniga, iskaashiga hay’adaha ammaanka, iyo xoojinta dadaallada lagu ilaalinayo nabadda iyo kala dambeynta.
