Koonfur Galbeed oo sheegtay inay ka jawaabeyso duulaanka Dowladda Soomaaliya
Maamulka Koonfur Galbeed ayaa xaqiijiyey in cutubyo ka tirsan ciidamada sida gaarka ah u tababaran ee Danab iyo Gorgor la geeyey qeybo kamid ah gobolka Baay, arrintaas oo dhalisay hadal-heyn siyaasadeed iyo walaac amni.
Guddoomiyaha Baarlamaanka Koonfur Galbeed, Dr. Cali Saciid Fiqi, ayaa qoraal uu ku daabacay bartiisa X (Twitter) ku sheegay in ciidamo ka tirsan Danab iyo Gorgor loo daadgureeyey deegaano ka tirsan gobolka Baay, gaar ahaan meelaha ku dhow magaalada Baydhabo.
Dr. Fiqi ayaa tallaabadan ku tilmaamay mid muujinaysa awood sheegasho, isagoo xusay in maamulka Koonfur Galbeed uusan aqbali doonin wax cabsi gelin ah. Wuxuu sidoo kale carrabka ku adkeeyey in haddii fariinta ka dambeysa dhaqdhaqaaqaasi ay tahay cadaadis siyaasadeed, ay diyaar u yihiin inay ka falceliyaan.
Dhaqdhaqaaqa ciidamada ayaa imaanaya xilli ay jirto xiisad siyaasadeed oo u dhaxeysa dowladda federaalka iyo qaar kamid ah dowlad goboleedyada, taas oo mararka qaar saameyn ku yeelata xaaladda amniga iyo maamulka deegaanada.
Si kastaba ha ahaatee, xaaladda gobolka Baay ayaa weli ah mid isha lagu hayo, iyadoo laga cabsi qabo in xiisaddan siyaasadeed ay isu beddesho mid amni oo saameyn ku yeelata shacabka ku nool deegaannadaas.
