Kenya oo Ra’iisul Wasaare ku-xigeenka Somalia ku eedeysay arrimo halis ah
Wararka laga helayo Nairobi ayaa sheegaya in dowladda Kenya ay dalka ka masaafurisay Ra’iisul Wasaare Ku-xigeenka Soomaaliya, Jibriil Cabdirashiid Xaaji Cabdi, oo hore u soo noqday ku-simaha madaxweynaha Koonfur Galbeed.
Sida lagu sheegay xogta la baahiyay, mas’uuliyiinta Kenya ayaa ku eedeeyay Jibriil inuu watay dukumentiyo Kenyan ah oo la sheegay in si sharci-darro ah lagu helay, taasoo sababtay in laga saaro dalka.
Wararka ayaa sidoo kale sheegaya in mas’uuliyiinta Kenya ay ku tuhunsan yihiin inuu ku lug lahaa qorshayaal lagu carqaladeynayo amniga deegaannada xuduudda la wadaago Soomaaliya iyo Kenya. Eedeymaha waxaa ka mid ah in hub loo qaaday deegaan ku dhow xadka, iyadoo lagu andacoonayo in hubkaas loogu talagalay maleeshiyaad beeleed, arrintaas oo Kenya ku tilmaantay mid khatar ku ah amniga xuduudda.
Sidoo kale, xogta la faafiyay waxay ku xiriirisay Jibriil dagaalladii dhawaan ka dhacay magaalada Baydhabo, kuwaas oo sababay dhimasho iyo barakac soo gaaray boqolaal qoys. Ilaa hadda ma jiraan caddeymo madax-bannaan oo xaqiijinaya eedeymahaas, mana jiro wax war rasmi ah oo kasoo baxay dowladda Soomaaliya ama xafiiska Ra’iisul Wasaare Ku-xigeenka oo ay kaga jawaabayaan.
Wararka ayaa intaa ku daraya in dadaallo ay sameeyeen siyaasiyiin Kenyan ah oo lagu doonayay in lagu joojiyo masaafurinta aysan guuleysan.
Dhanka kale, waxaa la sheegay in Jibriil Cabdirashiid uu dhawaan cusbooneysiistay baasaboorkiisa, iyadoo la filayo in sawirrada dukumentigaas la baahiyo saacadaha ama maalmaha soo socda.
