Dowladda Iiraan ayaa sheegtay inay fulisay xukun dil ah oo lagu riday nin lagu helay inuu u basaasayay Israa’iil, sida ay shaacisay hay’adda garsoorka dalkaasi 18-ka Maarso. Tani ayaa noqoneysa fulintii ugu horreysay ee noocan ah ee si rasmi ah loo shaaciyo tan iyo markii uu qarxay dagaalka u dhexeeya Iiraan, Israa’iil iyo Maraykanka.
War lagu daabacay barta Mizan Online ayaa lagu sheegay in xukunka dilka ah ee lagu riday nin lagu eedeeyay inuu la shaqeynayay sirdoonka Israa’iil la fuliyay subaxnimadii maanta. Ninkan ayaa la sheegay inuu siiyay saraakiisha sirdoonka xog iyo sawirro la xiriira goobaha xasaasiga ah ee dalka.
Ninka la dilay ayaa lagu magacaabi jiray Kouroush Keyvani, waxaana la xiray xilligii uu socday dagaal 12 maalmood socday oo u dhexeeyay Iiraan iyo Israa’iil bishii Juun. Intii uu socday dagaalkaasi, Maraykanka ayaa si kooban ugu biiray duqeymo lagu bartilmaameedsaday xarumaha nukliyeerka ee Iiraan.
Warbixinta ayaa sidoo kale sheegtay in ninkan uu kulammo la yeeshay saraakiil ka tirsan hay’adda sirdoonka Israa’iil, isla markaana uu tababar ku soo qaatay lix dal oo Yurub ah iyo magaalada Tel Aviv.
Dhinaca kale, 28-kii Febraayo, Israa’iil iyo Maraykanka ayaa weerarro ku qaaday gudaha Iiraan, kuwaas oo lagu dilay hoggaamiyaha sare ee dalkaasi, Ayatollah Ali Khamenei, isla markaana horseeday dagaal kale oo si degdeg ah ugu faafay gobolka Bariga Dhexe.
