Dowladda Soomaaliya oo weerar Gaadmo ah ku dishay horjooge & Xubno ka tirsan Al-Shabaab
Ciidamada Danab Oo Howlgal Qorsheysan Ku Dilay Xubno ka Tirsanaa Al-Shabaab
Ciidamada sida gaarka ah u tababaran ee Kumaandooska Danab ee Ciidanka Xoogga Dalka Soomaaliyeed ayaa xalay saqdii dhexe fuliyay howlgal si wanaagsan loo qorsheeyay oo ka dhacay tuulada Buula Cabdiyow, oo u dhow deegaanka Basra ee gobolka Shabeellaha Hoose.
Howlgalkan ayaa lagu beegsaday maleeshiyaad ka tirsan Al-Shabaab, iyadoo lagu soo waramayo in lagu dilay ugu yaraan 9 xubnood oo ka tirsanaa kooxda, kuwaas oo uu ku jiray horjooge sare.
Intii uu socday howlgalka, ciidamada Danab ayaa sidoo kale burburiyay fariisimo iyo godad ay ku dhuumaaleysanayeen xubnaha Al-Shabaab, iyo gaadiid ay isticmaalayeen.
Saraakiisha hoggaaminaysay howlgalka ayaa sheegay in uu ahaa mid si taxaddar leh loo qorsheeyay, isla markaana lagu bartilmaameedsaday goob ay ku sugnaayeen xubnaha kooxda.
Taliska Ciidamada Danab ayaa xusay in ay sii xoojin doonaan howlgalada noocan oo kale ah, si loo wiiqo awoodda Al-Shabaab, loona xaqiijiyo amniga guud ee dalka.
Howlgalladan ayaa qeyb ka ah dadaallada joogtada ah ee dowladda Soomaaliya ay kula dagaallamayso Al-Shabaab, si loo sugo nabadda iyo xasilloonida dalka.
