Dowladda Federaalka Soomaaliya ayaa si rasmi ah uga hadashay saameynta amni ee ka dhalatay aqoonsiga ay sheegtay inay Israa’iil siisay Maamulka Somaliland, iyadoo tilmaamtay in gobollada Waqooyi Galbeed ay hadda wajahaan xaalad amni oo ka duwan tii hore.
Wasiiru-dowlaha Wasaaradda Arrimaha Dibadda Soomaaliya, Cali Cumar Balcad, ayaa sheegay in deegaannadaas oo hore loogu yaqaanay xasillooni ay hadda galaan marxalad cusub oo xasaasi ah, taas oo la xiriirta isbeddellada siyaasadeed ee gobolka iyo falcelinta dhinacyada kala duwan.
“Gobolkii la oran jiray British Somaliland wuxuu ahaa mid deggan, balse markii ay timid Israa’iil, waxaa uu wajahayaa culeys amni ah, maadaama dhinacyo diidan ay joogaan Waqooyiga Gacanka Cadmeed sida Xuutiyiinta, ururo kalena waa la filan karaa,” ayuu yiri wasiiru-dowluhu.
Mas’uuliyiinta dowladda ayaa tilmaamaya in aqoonsigaasi uu horseedi karo:
- Kororka xiisadaha gobolka
- Dhaqdhaqaaqyo cusub oo kooxo hubeysan
- Faragelin dibadeed oo saameyn karta amniga xeebaha iyo marinnada muhiimka ah
Dowladda Soomaaliya waxay walaac ka muujisay in goobta juquraafiyeed ee Waqooyi Galbeed oo ku dhow Gacanka Cadmeed ay ka dhigeyso meel istiraatiiji ah oo ay daneeyaan quwadaha gobolka iyo kooxaha aan dowliga ahayn.
Warbixinta dowladda ayaa sidoo kale xustay joogitaanka iyo saameynta kooxaha sida Xuutiyiinta ee ka howlgala dhinaca kale ee Gacanka Cadmeed, kuwaas oo marar badan lala xiriiriyay weerarro iyo falal amni darro oo ka dhaca marin-biyoodka muhiimka ah.
Hadalkan ka soo baxay Dowladda Federaalka Soomaaliya ayaa imaanaya xilli ay sii kordhayaan doodaha ku saabsan mustaqbalka siyaasadeed ee gobollada Waqooyi Galbeed ee loo yaqaani Somaliland iyo xiriirkooda Caalamiga ah.
