Diyaarad Militari oo mar kale ka degtay Muqdisho iyo xog laga helay.
Diyaaradda Boeing C-17 Globemaster III oo ay leeyihiin Ciidamada Cirka ee Qatar ayaa mar kale maanta kasoo degtay magaalada Mogadishu, kadib duulimaad ay kasoo qaaday magaalada İzmir ee galbeedka Turkey.
Diyaaraddan oo ka mid ah diyaaradaha waaweyn ee qaada ciidamada iyo qalabka culus ee militariga ayaa toddobaadkan la sheegay inay samaysay duulimaadyo isdaba-joog ah oo u dhexeeya İzmir iyo Muqdisho, arrintaas oo dhalisay hadal-heyn iyo xiiso la xiriira waxa ay siddo iyo ujeedka socdaalladeeda.
Boeing C-17 Globemaster III waa diyaarad militari oo si gaar ah loogu isticmaalo daabulidda ciidamada, saanadda militari, gaadiidka gaashaaman, agabka culus iyo sidoo kale gurmadka degdegga ah. Waxay awood u leedahay inay qaaddo xamuul culus masaafo dheer iyadoo si degdeg ah uga degi karta garoomo kala duwan.
Khabiirrada amniga iyo ilo la socda dhaqdhaqaaqyada duulimaadyada ayaa sheegaya in diyaaraddan toddobaadkan dhowr jeer ku kala gooshay Muqdisho iyo İzmir, iyadoo aan ilaa hadda si rasmi ah loo shaacin waxyaabaha ay siddo.
Inkasta oo aysan jirin war rasmi ah oo kasoo baxay dowladda Soomaaliya, dowladda Qatar ama Turkey, haddana ilo kala duwan ayaa tilmaamaya in duulimaadyadan ay la xiriiri karaan dhowr arrimood oo ay ka mid yihiin:
taageero militari oo lagu xoojinayo hay’adaha amniga Soomaaliya,
gaarsiinta qalab iyo saanad ciidan,
tababaro iyo isku-xirnaan dhinaca militariga ah,
ama iskaashi amni iyo difaac oo saddex geesood ah oo u dhexeeya Soomaaliya, Qatar iyo Turkey.
Dhaqdhaqaaqan ayaa kusoo aadaya xilli Soomaaliya ay xoojinayso dib-u-dhiska ciidamadeeda, isla markaana ay sii kordhayaan iskaashiyada dhinaca amniga ee ay la leedahay dalalka taageera.
