Burburin xooggan ayaa maanta ka socota xaafado ku dhow Garoonka Eng. Yariisow ee degmada Cabdicasiis, iyo sidoo kale xaafadda Alcadaala ee degmada Heliwaa, taas oo keentay cabsi iyo walaac soo food saaray dadka deegaanka.
Wararka laga helayo goobahaasi ayaa sheegaya in ganacsato lagu eedeeyay inay dano gaar ah ka leeyihiin dhulkaasi ay keeneen cagafyo iyo shaqaale burburin wada, kuwaas oo bilaabay inay dumaan guryo iyo goobo ganacsi oo ku yaalla xaafadahaasi.
Dadka deegaanka ayaa cabasho xooggan ka muujiyay burburinta, iyagoo sheegay in aan la siin ogeysiis ku filan ama waqti ay uga guuraan guryahooda. Qaar ka mid ah dadkaasi ayaa ku eedeeyay ganacsatada inay dhibaato ku hayaan shacabka, iyagoo ku tilmaamay falka mid aan naxariis lahayn.
Sidoo kale, wararka ayaa intaas ku daraya in ragga hogaaminaya burburinta ay wataan oggolaansho iyo saxiixyo ay ka heleen madax ka tirsan dowladda federaalka iyo maamulka gobolka Banaadir, inkastoo aan weli si rasmi ah loo xaqiijin dukumiintiyadaasi.
Dhowrkii sano ee la soo dhaafay ayaa Dowladda Madaxweyne Xasan Sheekh Maxamuud waxaa ay ku howlaneyd burburinta dhulalka dowladda ay degan yihiin Dadka Shacabka ah, iyada oo markaas kadib laga iibsanayay dad Ganacsato ah oo wata lacag farabadan, waxana arrintaasi walaac xoogan ka muujiyay Dadka Shacabka ah.
