Ugu yaraan afar qof ayaa ku dhimatay, halka afar kalena laga soo badbaadiyay ka dib markii uu dumay dhismo ku yaalla xaafadda Blue Estate ee degmada Shauri Moyo ee magaalada Nairobi, sida ay xaqiijiyeen masuuliyiinta.
Kooxaha gurmadka degdegga ah ayaa weli wada howlaha samatabbixinta, iyaga oo baadi-goob ugu jira dad kale oo la rumeysan yahay in ay ku xaniban yihiin burburka dhismaha hoostiisa. Goobta ay wax ka dhaceen ayaa si adag loo ilaaliyay, iyadoo la adeegsanaayo qalab culus iyo shaqaale badan si loo dedejiyo badbaadinta.
Dhismahan dumay ayaa ku yaallay meel u dhow marinka Wabiga Nairobi, waxaana la sheegay in qayb ka mid ah horey loogu burburiyay mashruuca dib-u-soo-nooleynta wabiga Nairobi, taas oo su’aalo ka dhalisay xaaladda dhismaha ka hor burburka.
Masuuliyiintu waxay sheegeen in baaritaan rasmi ah la bilaabay si loo ogaado sababta rasmiga ah ee keentay burburka, iyadoo sidoo kale laga digay khatarta dhismayaasha aan la hubin tayadooda ee ku teedsan webiga.
Howlaha samatabbixinta ayaa la filayaa inay sii socdaan saacadaha iyo maalmaha soo socda, iyadoo rajadu tahay in la helo dad kale oo nolol lagu soo badbaadin karo.
