Ciidanka xoogga dalka oo baranaya Nidaamyada Casriga ah ee Difaaca Hawada iyo Drones-ka Qaraxyada
Dowladda Turkiga ayaa sare u qaaday taageerada ay siiso ciidamada qalabka sida ee Soomaaliya, iyadoo si gaar ah diiradda u saartay horumarinta awoodda difaaca hawada iyo adeegsiga tiknoolajiyada casriga ah ee dagaalka. Tababarro cusub oo ka socda Turkiga ayaa lagu barayaa cutubyo ka tirsan ciidanka Soomaaliya sida loo isticmaalo nidaamka Air Defence System iyo drones yar yar oo qaraxyo xambaara.
Tababarkan ayaa qeyb ka ah dadaallada lagu xoojinayo awoodda ciidamada Soomaaliyeed si ay uga hortagaan khataraha amni ee isa soo taraya, gaar ahaan kuwa la xiriira dagaalka casriga ah ee ku saleysan tiknoolajiyada. Saraakiil ka tirsan milatariga ayaa sheegay in barashada nidaamyadan ay muhiim u tahay la dagaallanka kooxaha hubeysan ee isticmaala farsamooyin cusub oo halis ah.
Drones-ka qaraxyada xambaara, oo mararka qaar loo yaqaan “loitering munitions” ama “suicide drones”, ayaa door muuqda ka ciyaaray dagaallo ka dhacay deegaanno ay ka mid yihiin Awdhiigle, Mubaarak, Sabiib iyo Caanoole. Qalabkan ayaa awood u leh in si sax ah u beegsado bartilmaameedyo muhiim ah, isagoo yareynaya khasaaraha kale ee ka dhasha dagaalka.
Wararka ayaa sidoo kale tilmaamaya in drones-kan horey loogu adeegsaday howlgalada ay fuliyeen shirkado ajnabi ah oo qandaraas kooban lagu siiyay, kuwaas oo la sheegay inay xiriir la lahaayeen khubaro ka socota Ukraine. Hase yeeshee, hadda waxaa la xaqiijiyay in ciidamada Soomaaliyeed si toos ah loogu wareejiyay aqoonta iyo farsamada adeegsiga qalabkan, taasoo ka dhigan isbeddel muhiim ah oo dhinaca madaxbannaanida hawlgallada milatari.
Dowladda Soomaaliya iyo Turkiga ayaa muddo dheer lahaa iskaashi milatari oo qoto dheer, iyadoo Turkigu uu kaalin weyn ka qaatay tababarka, qalabaynta iyo dhismaha ciidamada Soomaaliya. Tababarradan cusub ayaa la rumeysan yahay inay sare u qaadi doonaan awoodda ciidamada ee difaaca iyo weerarka labadaba, isla markaana ay gacan ka geysan doonaan xasillinta guud ee dalka.
