Baydhabo (Banaadir24) — Ciidamo ka tirsan Daraawiishta maamulka Koonfur Galbeed, kuwaas oo daacad u ah Madaxweynaha maamulkaas Cabdicasiis Xasan Maxamed Laftagareen, ayaa xalay lagu arkay goobo kala duwan oo ku yaalla duleedka magaalada Baydhabo ee xarunta gobolka Baay.
Wararka soo baxaya ayaa sheegaya in ciidamo si weyn u hubeysan lagu arkay deegaannada Bayburjaad, Haabare, Kuusow iyo Hinshaloole, halkaas oo dhaqdhaqaaqooda ciidan uu sare u qaaday dareenka amni ee magaalada iyo deegaanada ku xeeran.
Ilaa hadda si rasmi ah looma oga ujeeddada ka dambeysa dhaq-dhaqaaqyada ciidamadan, iyo in ay qeyb ka yihiin qorshe hawlgal milatari ama ay yihiin dhaq-dhaqaaqyo ciidan oo caadi ah.
Dhaqdhaqaaqyadan ayaa kusoo aadaya xilli ay sii xoogeysanayaan khilaafaadka siyaasadeed iyo kuwa amni ee u dhexeeya Dowladda Federaalka Soomaaliya iyo maamulka Koonfur Galbeed ee uu hoggaamiyo Cabdicasiis Laftagareen.
Xaaladda Baydhabo ayaa indhaha lagu hayaa, iyadoo weli aan la ogeyn tallaabada xigta ee dhinacyada ay xiisaddu ka dhexeyso.
