Wararka laga helayo ilo deegaanka ah ayaa sheegaya in ciidamadii Laftagareen ee horay ugu sugnaa deegaanka Awdiinle ay xalay soo gaareen magaalada Berdaale ee gobolka Bay.
Dhaqdhaqaaqan cusub ee ciidamadan ayaa kusoo beegmaya xilli ay hore u soo baxeen muuqaallo kooban oo ay duubeen saraakiil la sheegay inay hoggaaminayaan ciidamadaas, kuwaas oo ka dhawaajiyay qorshayaal suuragal ah oo ay ugu ruqaansanayaan magaalada Baydhabo, oo ah xarunta ku meel gaarka ah ee maamulka Koonfur Galbeed, halkaas oo ay ku sugan yihiin ciidamo taageersan dowladda federaalka.
Saraakiisha muuqaalka kasoo muuqday ayaa sidoo kale si dadban uga digay in xayiraado la saari karo dhaqdhaqaaqa garoonka diyaaradaha ee Baydhabo, arrintaas oo sii kordhin karta welwelka laga qabo saameynta ay ku yeelan karto isu socodka shacabka iyo howlaha gargaarka.
Xaaladda guud ee gobolka Bay ayaa lagu tilmaamayaa mid aad u kacsan, iyadoo dadka deegaanka ay muujinayaan cabsi sii kordheysa oo la xiriirta kororka dhaqdhaqaaqa kooxaha hubeysan ee ku sugan qaybo ka mid ah gobolka. Ilo wareedyo ayaa sheegaya in dhaq-dhaqaaqyada milatari ay si xawli ah u kordhayaan, taasoo keentay walaac ku saabsan suurtagalnimada isku dhacyo hubeysan oo ka dhaca gudaha Baydhabo iyo nawaaxigeeda.
Ma jiro wax war rasmi ah oo ilaa iyo hadda kasoo baxay maamulka Koonfur Galbeed ama dowladda federaalka oo si toos ah uga hadlaya dhaqdhaqaaqyada la sheegay, hase yeeshee indhaha ayaa si dhow loogu hayaa horumarka xaaladda, maadaama ay saameyn ku yeelan karto xasilloonida guud ee gobolka.
