Xiisad culus ayaa weli ka taagan xaafadda Mirinaayo ee degmada Cabdicasiis, Muqdisho, halkaas oo ay isku horfadhiyaan ciidamada dowladda Federaalka Soomaaliya iyo ciidamada taageersan madaxweynihii hore ee Soomaaliya, Shariif Sheekh Axmed.
Iska horimaadkan oo billowday habeenkii Arbacada ayaa ka dhashay muran siyaasadeed oo sii xoogeysanayay maalmihii la soo dhaafay, iyadoo labada dhinac ay isku adeegsadeen hub culus. Goobjoogayaal ayaa sheegay in ugu yaraan laba gaari oo gaashaaman ay ku gubteen dagaallada ka dhacay aaggaasi.
Mucaaradka, oo uu qeyb ka yahay raysal wasaarihii hore Xasan Cali Kheyre, ayaa dowladda ku eedeeyay inay cadaadis ku hayso hoggaamiyeyaasha mucaaradka isla markaana ay xaddideyso dhaqdhaqaaqyadooda siyaasadeed. Dowladda uu hoggaamiyo Madaxweyne Xasan Sheekh Maxamuud ayaa dhankeeda sheegtay inay ka shaqeynayso sugidda amniga iyo kala dambeynta.
Inkastoo dadaallo dhexdhexaadin ah ay socdaan, ciidamada labada dhinac ayaa weli ku sugan fariisimahoodii, iyadoo shacabka deegaanka ay ka cabanayaan barakac, burbur hantiyeed iyo cabsi amni oo sii kordheysa. Wadahadallada lagu doonayo in lagu dejiyo xaaladda ayaa weli socda si looga hortago inuu khilaafku isu beddelo dagaal ballaaran.
Intaa waxaa sii dheer, wada-hadallo u dhexeeya wakiillo ka socda dowladda Federaalka Soomaaliya iyo hoggaamiyeyaasha mucaaradka ayaa weli socda ilaa maanta oo Jimco ah. Inkastoo dagaalladii xooganaa ay yaraadeen, haddana is-horfadhiga hubeysan ee ka taagan xaafadda Mirinaayo wali xal kama gaarin, taasoo sare u qaaday walaaca laga qabo amniga Muqdisho iyo xasilloonida siyaasadeed ee dalka.
