Ciidamada Laftagareen oo Baydhabo kusii fidaya, dagaal iyo qaraxyo laga soo sheegayo xaafado badan
Xaaladda magaalada Baydhabo ayaa saacadihii lasoo dhaafay sii xumaatay, iyadoo ciidamada Daraawiishta ee taabacsan madaxweynihii hore ee Koonfur Galbeed, Cabdicasiis Xasan Maxamed “Laftagareen”, lagu soo warramay inay gudaha u galeen qaybo badan oo magaalada ah.
Muuqaalo lagu baahiyey baraha bulshada, ayaa muujinaya in ciidamada Laftagareen ay qabsadeen ama gaareen xaafado dhowr ah oo Baydhabo ka tirsan. Qaar ka mid ah wararka ayaa xitaa sheegaya in ciidamadaasi ay la wareegeen inta badan magaalada, inkastoo sheegashadaas aan weli si madax-bannaan loo xaqiijin.
Dagaal culus ayaa ka socda gudaha Baydhabo, iyadoo la maqlayo rasaas xooggan iyo qaraxyo ka dhacay goobo kala duwan. Wararkii ugu dambeeyay ayaa tilmaamaya in dagaalladu ay gaareen Suuqa Xoolaha, kaddib markii hore loogu soo warramay iska horimaadyo ka dhacay Al-Faras, Boonkaay iyo Al-Axmaar.
Ciidamada Laftagareen ayaa dagaalka kula jira ciidamada dowladda federaalka ee taageeraya maamulka uu hoggaamiyo Sheekh Aadan Madoobe. Labada dhinac ayaa isku haya cidda sharci ahaan maamusha Koonfur Galbeed, iyadoo khilaafkii siyaasadeed uu isu beddelay dagaal toos ah oo ka socda caasimadda maamulka.
Warar hore ayaa sidoo kale sheegay in ciidamada Laftagareen ay maalmahan kusoo dhowaadeen magaalada, halka shalay la arkay ciidamo iyo gaadiid militari oo lagu soo bandhigay duleedka Baydhabo.
Xaaladda magaalada ayaa weli ah mid si degdeg ah isu beddeleysa, mana jiro ilaa hadda tiro rasmi ah oo la isku raacsan yahay oo ku saabsan khasaaraha ka dhashay dagaallada cusub.
Haddii ciidamada Laftagareen ay si dhab ah ula wareegaan qaybo ballaaran oo Baydhabo ah, arrintaasi waxay noqon kartaa isbeddel weyn oo ku yimaada dagaalka iyo loollanka siyaasadeed ee ka taagan Koonfur Galbeed.
