Ciidamada Xoogga Dalka Soomaaliyeed oo kaashanaya saaxiibada caalamiga ah ayaa guul ka gaaray howlgal culus oo ay ka fuliyeen Gobolka Shabeellaha Hoose, kadib markii ay si buuxda ula wareegeen gacan ku haynta degaanka Ugunji oo muddo dheer ay maamulayeen maleeshiyada Al-Shabaab.
Howlgalkan oo ahaa mid qorsheysan ayaa yimid kadib dhaq-dhaqaaqyo milatari oo maalmihii la soo dhaafay ka socday gobolka, iyadoo ciidamada dowladda ay cadaadis xooggan saarayaan kooxaha argagixisada ah. Wararka laga helayo degaanka ayaa sheegaya in dagaal kooban kadib ay ciidamada u suurtagashay inay gudaha u galaan Ugunji, isla markaana ay ka saaraan maleeshiyadii ku sugneyd halkaasi.
Saraakiisha hoggaamineysa howlgalka ayaa sheegay in hadda ay ciidamadu wadaan baaritaanno amni oo ay ku xaqiijinayaan nabadgelyada degaanka, gaar ahaan miino baaris lagu sameynayo waddooyinka iyo goobaha muhiimka ah. Al-Shabaab ayaa inta badan adeegsata miinooyin iyo walxaha qarxa si ay u waxyeelleeyaan ciidamada iyo shacabka, taasoo keentay in si taxaddar leh loo baaro degaanka.
Dhanka kale, wararka laga helayo Ugunji ayaa tilmaamaya in inta badan shacabka degaanka ay hore uga barakaceen guryahooda, iyagoo ka cabsi qabay in dagaallo culus ay ka dhacaan degaanka. Waxaa la filayaa in dib u soo laabashada dadka rayidka ah ay bilaabato marka xaaladda amni la xaqiijiyo.
Howlgalladan ayaa qeyb ka ah dadaallada dowladda Federaalka Soomaaliya ay ku dooneyso inay ku xoreyso degaanada ay weli ku sugan yihiin Al-Shabaab, gaar ahaan Gobolka Shabeellaha Hoose oo ah meel istaraatiiji ah. Bilihii la soo dhaafay, ciidamada dowladda ayaa guulo isdaba joog ah ka gaarayay gobolka, iyagoo dib ula wareegay degaano dhowr ah oo muhiim u ahaa isku socodka iyo sahayda maleeshiyada.
Mas’uuliyiin ka tirsan dowladda ayaa sheegay in howlgaladu sii socon doonaan ilaa laga xaqiijiyo in gebi ahaanba laga cirib tiro kooxaha argagixisada ah ee ku sugan gobolka, isla markaana dib loo soo celiyo xasiloonida iyo noloshii caadiga ahayd ee shacabka.
