C/Cabdishakuur oo qeylo dhaan soo saaray & Xasan Sheek oo ciidamo cusub kusoo daadiyay Muqdisho
Xildhibaan ka tirsan mucaaradka Soomaaliya ayaa ka digay in dhaq-dhaqaaqyada ciidan are sii kordhaya ee ka socda magaalada Muqdisho ay muujinayaan diyaar-garow suurtagal ah oo loogu jiro iska horimaad siyaasadeed.
Cabdiraxmaan Cabdishakuur Warsame, oo ah xildhibaan ka tirsan Baarlamaanka Federaalka Soomaaliya, ayaa sheegay in la sameeyay cutubyo cusub oo Kamid ah ciidamada ammaanka oo la sheegay inay la shaqeeyaan madaxtooyada, kuwaas oo la dhigay isgoysyada muhiimka ah ee magaalada iyo goobaha ay inta badan ku kulmaan mucaaradku. Sidoo kale wuxuu xusay in ciidamadii hore ee ka shaqaynayay sugidda amniga caasimadda qaarkood dib loogu diray meelo ka baxsan Muqdisho.
“Arrimahani waxay mucaaradka u dirayaan fariin ah in laga yaabo in la diyaarinayo xaalad iska horimaad ah halkii la raadin lahaa xal wada-hadal ah,” ayuu ku qoray maqaal ra’yi ah oo uu ku daabacay boggiisa Substack.
Xildhibaanku si toos ah uguma eedeyn dowladda inay qorsheynayso rabshado, balse wuxuu tilmaamay in duruufaha siyaasadeed ee hadda jira ay mucaaradku u arkaan tallaabooyinkan kuwo muujinaya diyaargarow colaadeed. Wuxuu intaas ku daray in dowladuhu mararka qaarkood dib u habeyn ku sameeyaan qorshayaasha amniga marka ay jiraan xaalado hubanti la’aan siyaasadeed ah.
Hadalladan ayaa kusoo beegmaya xilli khilaafka siyaasadeed ee ka dhashay wax-ka-beddellada lagu muransan yahay ee dastuurka Soomaaliya uusan weli helin xal muuqda. Mucaaradka oo ay ku mideysan yihiin golaha loo yaqaan “Golaha Mustaqbalka”, isla markaana ay ku jiraan dowlad-goboleedyada Puntland iyo Jubaland, ayaa diiday wax-ka-beddelladaas.
Sidoo kale weli lama gaarin heshiis ku saabsan nidaamka doorashooyinka ee wareegga xiga. Muddo xileedka Baarlamaanka Federaalka iyo kan Madaxtooyadaba ayaa hadda muran ka taagan yahay; dowladda ayaa ku doodeysa in muddo-xileedku yahay shan sano oo soconaya illaa May 2027, halka mucaaradku ay ku adkeysanayaan in waqtiga dastuuriga ah ee May 2026 aan la dhaafin karin.
Cabdiraxmaan Cabdishakuur ayaa sidoo kale ka digay hoos u dhac ku yimid niyadda ciidamada Xoogga Dalka Soomaaliyeed, isagoo sabab uga dhigay mushaharro hoose, eex ku saabsan dallacsiinta, iyo qoysaska askarta oo barakac la kulmay. Wuxuu sheegay in arrimahan ay khatar sii kordhin karaan haddii xiisadda siyaasadeed ay sii xoogeysato.
