Warsaxaafadeed kasoo baxay Madasha Samatabixinta Soomaaliyeed ayaa lagu shaaciyay in dib loo dhigay bannaanbaxii nabadeed ee lagu waday inuu dhaco 16-ka May 2026.
Madashu waxay sheegtay in go’aanka dib u dhigista loo qaatay si fursad loo siiyo wada-hadallada u dhexeeya Dowladda Federaalka Soomaaliya iyo Golaha Mustaqbalka Soomaaliyeed, kuwaas oo ay dhex dhexaadinayaan xubno ka tirsan beesha caalamka.
Qoraalka ayaa lagu sheegay in wada-hadalladu diiradda saarayaan arrimo ay kamid yihiin:
- Xabsiga sharci darrada ah
- Doorashooyinka
- Maareynta marxaladda kala guurka siyaasadeed ee dalka
Madasha Samatabixinta Soomaaliyeed ayaa sidoo kale caddeysay in bannaanbaxa uu ahaa mid nabadeed oo lagu dalbanayay:
- Joojinta barakicinta
- Doorashooyin hufan
- Ilaalinta dastuurka
- Amniga iyo xuquuqda muwaadiniinta
Sidoo kale waxaa lagu sheegay warsaxaafadeedka in taariikh cusub oo bannaanbaxa dib loo qabanayo la shaacin doono marka horumar laga gaaro wada-hadallada socda.
