Al-Shabaab oo lagu duqeeyay gobolka Baay & Wararkii ugu dambeeyay
Wararka laga helayo Gobolka Baay ayaa sheegaya in xalay duqeymo cirka ah lagu bartilmaameedsaday fariisimo looga shakisan yahay Al-Shabaab oo ku yaalla deegaanno hoostaga magaalada Baydhabo.
Ilo deegaanka ah ayaa sheegay in goobaha la weeraray ay ka mid yihiin meelaha ay kooxda Al-Shabaab ku leedahay dhaq-dhaqaaqyo ciidan, hase yeeshee lama oga khasaaraha rasmiga ah ee ka dhashay duqeymaha, mana jiro war rasmi ah oo ay soo saareen hay’adaha ammaanka.
Duqeymahan ayaa imanaya iyadoo ay sii kordhayaan walaacyada la xiriira joogitaanka Al-Shabaab ee deegaanno dhowr ah oo ku teedsan waddada Buurhakaba iyo Baydhabo. Wararka laga helayo deegaanka ayaa sheegaya in kooxda ay dhaqdhaqaaqyo ka samaynayso meelo ay ka mid yihiin Mooda-Moode, Karooroogi, Daynuunay, Dambalka, Gasarta iyo agagaarka Bay-Burjeed.
Baydhabo oo ah xarunta maamulka Koonfur Galbeed Soomaaliya ayaa weli ah magaalo istaraatiiji ah oo muhiim u ah hawlgallada dowladda iyo sugidda ammaanka gobolka.
Duqeymahan iyo dhaq-dhaqaaqyada ciidan ee la soo wariyay ayaa muujinaya caqabadaha amni ee weli ka jira Gobolka Baay, xilli ciidamada dowladda Soomaaliya iyo saaxiibadooda caalamiga ah ay sii wadaan howlgalada ka dhanka ah Al-Shabaab si looga hortago khataraha kooxda uga imaan kara xarumaha waaweyn ee shacabka iyo goobaha muhiimka ah.
Ilaa hadda Dowladda Federaalka Soomaaliya iyo maamulka Koonfur Galbeed ma aysan soo saarin war rasmi ah oo ku saabsan duqeymaha la sheegay inay dhaceen ama xaaladda amni ee ka jirta deegaannada ku xeeran Baydhabo.
