Muqdisho (Banaadir24) — Dowladda Soomaaliya ayaa ka digtay in sii xoogeysashada colaadaha iyo xasillooni darrada siyaasadeed ee Itoobiya ay saameyn taban ku yeelan karaan howlgalka Midowga Afrika ee Soomaaliya, gaar ahaan dagaalka ka dhanka ah kooxda Al-Shabaab.
Wasiiru-dowlaha Wasaaradda Arrimaha Dibadda Soomaaliya, Cali Maxamed Cumar (Cali Balcad), oo wareysi siiyay telefishinka TRT World, ayaa sheegay in amniga Itoobiya uu si toos ah ula xiriiro amniga Soomaaliya, maadaama labada dal ay wadaagaan xuduud dheer iyo xiriir dhaqaale, bulsho iyo taariikheed.
Cali Balcad ayaa ka digay in haddii colaadaha gudaha Itoobiya ay sii dheeraadaan, ay suuragal tahay in ciidamada Itoobiya ee qeybta ka ah howlgalka Midowga Afrika ee AUSSOM dib loogu yeero dalkooda ama loo weeciyo howlaha amniga gudaha, taas oo saameyn ku yeelan karta howlgallada ka dhanka ah Al-Shabaab ee Soomaaliya.
Itoobiya ayaa ka mid ah dalalka ciidamada ugu badan ku biiriyay howlgalka AUSSOM, iyadoo Midowga Afrika uu ansixiyay in dalkaasi uu howlgalka ku yeesho ku dhowaad 2,500 oo askari, marka laga soo tago ciidamo kale oo ku jooga Soomaaliya heshiisyo amni oo gaar ah.
Digniinta Soomaaliya ayaa imaneysa xilli Itoobiya ay wajahaysa xiisado amni oo kala duwan, kuwaas oo ay ka mid yihiin dagaallada gobolka Amxaarada, xiisadaha dib uga soo cusboonaaday gobolka Tigray kaddib burburka heshiiskii Pretoria ee 2022, iyo khilaafka sii xoogeysanaya ee kala dhexeeya Eritrea.
Wasiir Balcad ayaa sidoo kale xusay in amni darrada Itoobiya ay saameyn ku yeelan karto bulshada Soomaaliyeed ee ku nool dowlad deegaanka Soomaalida Itoobiya, oo xuduud la leh Soomaaliya.
Howlgalka AUSSOM ayaa bishii Janaayo 2025 beddelay howlgalka ATMIS, waxaana ujeedkiisu yahay taageeridda ciidamada Soomaaliyeed ee dagaalka kula jira Al-Shabaab, sugidda amniga xarumaha muhiimka ah iyo xoojinta hay’adaha amniga dalka.
Digniintan ayaa imaneysa xilli dowladda Soomaaliya iyo saaxiibadeeda Midowga Afrika ay ku howlan yihiin qorshaha ay ciidamada Soomaaliyeed si tartiib tartiib ah ula wareegayaan mas’uuliyadda amniga dalka, iyadoo weli ay taagan tahay khatarta Al-Shabaab.
