Kooxda Xuutiyiinta Yemen ayaa ku dhawaaqday inay xayiraad cusub kusoo rogeen dhaq-dhaqaaqa maraakiibta la xiriira Israa’iil ee maraya Badda Cas, iyagoo sheegay inay beegsan doonaan sahay kasta oo loo wado dekedaha Israa’iil.
Afhayeen u hadlay Xuutiyiinta ayaa sheegay in go’aankan uu qayb ka yahay taageerada ay u muujinayaan shacabka Falastiin, Lubnaan iyo Iran, isagoo xusay in kooxdu ay sii wadi doonto tallaabooyinka ay ku sheegtay inay cadaadis ku saarayaan Israa’iil iyo xulafadeeda.
Xayiraaddan cusub ayaa sare u qaadaysa walaaca laga qabo amniga marin-biyoodka Badda Cas, oo kamid ah waddooyinka ganacsi ee ugu muhiimsan caalamka. Khubarada dhaqaalaha iyo maraakiibta ayaa ka digaya in carqalad kasta oo ku timaadda isu socodka maraakiibta gobolka ay saameyn ku yeelan karto silsiladaha sahayda, qiimaha shidaalka iyo ganacsiga caalamiga ah.
Arrintan ayaa sidoo kale kusoo aadaysa xilli xiisadaha gobolka ay sii kordhayaan, iyadoo marinka Hormuz uu weli yahay meel istiraatiiji ah oo si dhow loola socdo dhaqdhaqaaqiisa, maadaama uu door weyn ku leeyahay isu socodka tamarta iyo ganacsiga caalamiga ah.
Ilaa hadda ma jiro war rasmi ah oo kasoo baxay Israa’iil ama quwadaha reer galbeedka oo ku saabsan tallaabooyinka cusub ee ay ku dhawaaqeen Xuutiyiinta, hase yeeshee indhaha caalamka ayaa ku wajahan saameynta ay ku yeelan karto ganacsiga iyo amniga gobolka.
