Jeneraal Mahad Cabdiraxmaan “Shub”, oo horey u soo noqday Taliyaha Ciidanka Asluubta Soomaaliya, iyo saddex xubnood oo qoyskiisa ka tirsan ayaa dhaawacyo fudud ku soo gaaray duqeyn cirka ah oo lagu qaaday hoygiisa magaalada Doolow.
Jeneraal Shub ayaa dhaawac ka soo gaaray jajabka birta ee wejiga, halka xaaskiisa iyo laba qof oo kale oo qoyskiisa ah ay soo gaareen dhaawacyo fudud. Waxaa la sheegay in Jeneraalka loo qaaday xarun ammaan ah oo ay maamulaan ciidamada Jubbaland, halkaas oo lagu daweynayo.
Ilo amni ayaa sheegay in laba gantaal ay ku dhaceen afaafka iyo gudaha guriga Jeneraalka, kaas oo ku dhow garoonka diyaaradaha Doolow. Gantaal kale ayaa la sheegay inuu ku dhacay guriga guddoomiyaha degmada.
Doolow waxay ku taallaa meel u dhow xuduudaha Soomaaliya, Itoobiya iyo Kenya, iyadoo deegaanka uu muddooyinkii dambe ka jiray xiisad siyaasadeed iyo mid amni oo u dhexeysa dowladda federaalka iyo maamulka Jubbaland.
Ilo amni ayaa sidoo kale sheegay in diyaarado hawada laga maqlayay tan iyo galinkii dambe ee maanta, iyagoo ku andacooday in weerarka uu fuliyay drone ay Türkiye siisay Soomaaliya, kaas oo loogu talagalay hawlgallada la-dagaallanka argagixisada.
Maamulka Koonfur Galbeed ee taageersan Cabdicasiis Xasan Maxamed Laftagareen ayaa bayaan uu soo saaray ku eedeeyay diyaaradaha dagaalka ee Türkiga inay fuliyeen waxa uu ku tilmaamay isku day lagu khaarajinayay Jeneraal Shub, isagoo xaqiijiyay in Jeneraalka uu dhaawacmay.
Eedeyntan ayaa kusoo biireysa eedeymo hore uga soo baxay garabka Laftagareen, kuwaas oo Türkiga ku eedeeyay inay faragelin ku sameyneyso khilaafaadka siyaasadeed ee gudaha Soomaaliya, isla markaana ay taageereyso dowladda federaalk.
Ilaa hadda, ma jiro xaqiijin madax-bannaan oo caddeyneysa cidda fulisay duqeynta ama nooca diyaaradda loo adeegsaday.
