Weerar Madaafiic ah oo lagu qaaday Xerada Ciidamada Hiilweyne ee degmada Balcad & khasaaraha…
Maleeshiyaad la rumeysan yahay inay ka tirsan yihiin ururka Al-Shabaab ayaa weerar madaafiic hoobiyeyaal ah ku qaaday Xerada Hiilweyne oo ku taalla inta u dhaxeysa magaalada Muqdisho iyo degmada Balcad ee gobolka Shabeellaha Dhexe.
Sida ay sheegeen goobjoogayaal ku sugan deegaanka ku dhow xerada, waxaa si xooggan loo maqlayay jugta madaafiicda hoobiyeyaasha oo ku dhacayay agagaarka xerada, taasoo cabsi ku abuurtay dadka ku nool deegaannada u dhow.
Xerada Hiilweyne ayaa lagu soo waramayaa inay ku xareysan yihiin boqolaal askari oo ka tirsan Ciidamada Dowladda Federaalka Soomaaliya, kuwaas oo qaarkood tababar u dhamaaday halka kuwo kalena uu weli u socdo tababar ciidan.
Ilaa iyo hadda ma jiro war rasmi ah oo kasoo baxay saraakiisha ciidamada dowladda oo ku saabsan khasaaraha ka dhashay weerarka madaafiicda ah ee lagu qaaday xerada.
Sidoo kale lama oga tirada madaafiicda la riday iyo goobaha saxda ah ee ay ku dhaceen, iyadoo xaaladda goobta ay weli tahay mid aan si buuxda loo xaqiijin karin.
Weerarkan ayaa kusoo aadaya xilli ay marar badan weerarro noocan oo kale ah lagu qaado saldhigyada ciidamada dowladda iyo xarumaha amniga ee ku yaalla gobolka Shabeellaha Dhexe iyo agagaarka magaalada Muqdisho.
